Su Casteddu est prontu po sa prima partida uficiali de ocannu: cenarba, in sa Domus Arena lompit su Perugia a is ses mancu unu cuartu po si giogai su passagiu in Coppa Italia. Ma sa conca de is giogadoris est totu po su campionau. In Coppa at essi dificili meda, po Liverani, a fairi giogai calencunu de cusssus chi si funt strupiaus, sa spera est a ddus tenni po sa prima de campionau de su 13 de austu in Como.
In su fratempus, sa Lega de Serie B, at fatu connosciri dis e orarius de sa cuarta, cuinta e sesta giornada. Su Casteddu, in sa cuarta, at essi sa prima scuadra a calai in campu, contras de su Modena, cenarba su 2 de cabidanni, a is otu e mesu de merì. Po sa cuinta, is piciocus de Liverani funt atendius in Benevento sabudu dexi, a is duas de pustis prangiu: partida caglienti meda, po su clima ancora estivu e poita ant a rtorrai in sa citadi campana Viola e Lapadula chi finas a ocannu passau giogaiat inigui. In sa sesta partida su Casteddu si dda giogat cun su Bari in sa Domus sabudu 17, ancora a is duas de pusti prangiu.
Eris at chistionau Deiola nendu ca at prantu meda e non ddu at dromiu po dis intreas po sa calada in Serie B.
Dus mesis de fatu abarrat su dolu, ma totu s’orrestu s’est mudau in gana e Alisandru Deiola non bit s’ora de calai in campu po si ndi tirai de conca cussu disisperu de su merì de Venetzia e provai a torrai a portai su Casteddu in Serie A.
“Est una cosa chi nosi portaus anintru. Est lompia s’ora de girai pagina, sighiri is indicus de s’allenadori e sighiri su caminu nostu chi depit essiri feti cussu de torrai in A”, at nau Deiola, coru casteddaiu. “De sardu mi soi intendiu ancora prus responsabili po cussu chi est sussediu e paris a sa sociedadi eus portau a innantis custa chistioni: tocat a torrai a si ndi pesai”.
Candu ddi pregontant de sa possibili fascia de capitanu Deiola arrespundit: “iat essi un’onori mannu a dda portai in su brassu, ma funt chistionis chi at pigai su “Mister”. Chena ci pensai meda a chini at essi su capitanu, totus depeus essiri prontus a gherrai”.
Màuru Mura
3 de austu de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.aia-figc.it/news/coppa-italia-frecciarossa-designazioni-trentaduesimi-20381/
