In d’una sparatoria in Raleigh, in su North Carolina, de cantu si scit funt abarradas bocias cincu personis, e intru custus fintzas un’agenti chi non fut in servitziu. Dus, sonumancu, is lantiadus. Su bocidori, de cantu narat sa politzia de su logu, est stetiu acapiau. Totu custu est sussediu in d’una trancuilla zona residentziali prena de domigeddas chi parint villetas e campus de golf. Medas funt galu is cosas de acrariri.

Presoni a vida, invecias, est sa pena donada a Nikolas Cruz, su giovunu chi in su 2018 iat bociu catodixi discientis e tres maistaa in d’unu liceu de Parkland, in Florida.

Sa sententzia non c’est calada a totus e is familiaris de is mortus de sa stragi non ddu ant mandau a nai. Sa spera de totu is parentis fut cussa de biri cundennau Cruz a sa pena de morti e po cussu funt abarraus arrabiaus, deludius e cun is ogus prenus de lambrigas. Po sa pena de morti, perou, serbiat chi totu sa giuria fessit de acordiu, ma aici no est stetiu. Si bit ca unu o prus giuraus ant ritenniu ca Cruz teniat calencuna scusanti po su machimmini chi at cumitiu, tra custas su fatu de essiri figliu de una femina chi umperaiat alcol e drogas giai candu fut pringia. E custas scusas ant bintu cunfroma, invecias, a is agravantis comenti su airi decidiu a innantis e sa crudeltadi de sa stragi.

“Ci funt unu muntoni de personis chi bufant e tenint pipius chi non diventant assassinus”, at nau sa mama de una de is pipias abarradas bocias.

“Soi schifau de su sistema legali nostu, de is giuraus nostus. Po cali motivu tandu in Florida teneus sa pena de morti? Aici nascit unu precedenti po su macu chi at a lompiri sparendu a chine chi siat”, at aciuntu su babbu de Alyssa Alhadeff, un’atra de is pipias bocias de Nikolas Cruz.

Sciollorius, machiminis chi parint sussedant feti in America, in cussu Sistema democratigu aunia est prus facili a si comporai un’arma che unu orrogu de pani. E dda tzerriant democratzia…

 

 

Màuru Mura

 

 

Cenarba, su 14 de Santu Gaine de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

 

Foto: https://www.rainews.it/articoli/2022/10/ergastolo-per-nikolas-cruz–lautore-della-strage-di-parkland-nel-2018-e24061c7-6a69-4ac7-9764-1038698cbfd2.html