De eriseru a merì su Casteddu est serrau in Asseminello po cicai cuncentratzioni manna po sa partida de sabudu cun su Brescia, chi de cusata serie B est una de is scuadras prus fortis. Is piciocus de Liverani, a pustis s’allenamentu de eris, funt aici abarraus totu paris e ddue ant abarrai finas a sabudu a pusti prangiu, candu, in segus s’ant acostiai a sa Domus Arena po si giogai sa partida cun is rundineddas brescianas.
In s’allenamentu de eris, calencunu passigeddu a innanti at fatu Rog, chi at trabagliau in parti cun s’orrestu de sa truma. Feti de fatu a sa rifinidura de cras a mengianu Liverani at decidiri chi ddu ponni o nou in sa lista de is convocaus po sa partida. Po s’orrestu istant totus beni e de is bogis chi bessint de Asseminello s’allenadori de su Casteddu iat bolli ponni in campu sa copia Lapadula-Pavoletti in atacu giai de su cumentzu de sa gara. Custus dus podint fairi sa diferentzia, ca funt dus margianis de s’area de rigore e is numurus chi podint contai de sa carriera insoru chistionant po issus.
Is duas scuadras lompint a custa partida a pustis dus paregius, su Casteddu po 0-0 cun su Genoa e su Brescai, in domu sua, po 1-1 cun su Cittadella. Ma est fintzas a nai ca is lombardus tenint cincu puntus in prus de is sardus. Po chini connoscit ben isa Serie B non funt nudda poita cun d’una pariga de partidas bintas si podit passai de is peis de sa classifica a sa conca e su Casteddu tenit totu is numurus po ddu fairi: giogadoris, fama e gloria, tifosus e unu stadiu chi fintzas a una pariga de annus a immoi fut unu “fortinu”. Su caminu est longu, ma seus segurus ca Liverani at agatai is mesuras po s’obietivu chi nono podit non essiri sa serie A. Immoi su fueddu passat a s ucampu: pagus fueddus e feti gana, barra, ca biendu is atras scuadras si podit! Fortza Casteddu!
Màuru Mura
Cenarba, su 14 de mesi de ladamini de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.giemmestore.com/it/bandiera-100×140-cm-cagliari-calcio/12651/
