Sa bona arrennescida de s’alliantzia intru de is Birdis cun sa Manca cun s’eletzioni in sa Camenra de Francisca Ghirra est su primu passu de importu mannu po fraigai una coalitzioni chi s’aprontat a curriri po is eletzionis regionalis de su 2024.
“Su 5,13% chi eus pigau in Sardigna est unu numuru chi nosi allirgat su coru e nosi fait pensai ca ci funt totu is possibilidadis po cresciri ancora de prus”, at nau su presidenti de is Progressistas Massimu Zedda chi eris – paris a sa deputada noa e a su caputruma Franciscu Agus – at pigau cuscientzia de s’arresurtau de su 25 de cabudanni passau. S’allenatzia est lompia cuasi a s’11% in Casteddu. “Una basi bona meda po su bendori – at nau Agus – unu benidori chi depit essiri inderetura”. Po sa Ghirra “su trabbagliu fatu in campagna eletorali est stetiu spantosu, castiendu massimamenti ca si chistionaiat feti de Fradis d’Italia e Partidu Democratigu. Unu trabbagliu fatu totu paris chi at fatu cumprendiri ca in is territorius abbisongiat a tenni unu riferimentu politigu. C’est gana meda de manca e in su 2024 ce dda eus a fairi a nosi torrai a pigai su guvernu de sa Regioni”.
Immoi, at aciuntu Zedda, tocat a sighiri su caminu chi est nasciu su 7 de triulas passau cun totu is fortzas politigas chi non s’arreconnoscint in sa magiorantzia chi sustenit sa Giunta Solinas. Zedda si riferit a su “Seminario per la vittoria – Quale programma? – Quale coalizione” in s’Edificio “Sali scelti” in su Parcu de Molentargius de cuasi tres mesis a oi aunia ddue futn is Progressistas, cuasi totu su Partidu Democratigu, is Steddaus, LeU, Natzioni sarda giustizia e libertà cun Paulu Maninchedda e Paulu Mureddu, Italia Viva, is Socialistas italianus, Progetto Comunista, Atzione de Carrulu calenda e Centro democratico.
Po Zedda, sa suma de is numurus pigaus de chini fait opositzioni in regioni funt de prus de chini invecias guvernat. S’indicu, po Zedda, est craru: is sardus ci bolint stupai custa giunta regionali. Po custu s’augurat chi su caminu de triulas abarrit e s’afortit sempiri de prus.
Màuru Mura
Mercuris, su 12 de mesi de ladamini de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.facebook.com/sinistra.sardegna/
