In su gironi H de Champions League is biancusnieddus de Massimiliano Allegri bessint de su campu batius po dus a zeru de su Maccabi Haifa. Dus gol de Atzili ant permitiu a sa scuadra israiliana de binciri una partida in Champions a pustis de bint’annus. Sa Juventus at fatu biri calencuna cosa de giogu feti candu fut giai a suta e a pagu est serbiu unu segundu tempus giogau a sa “garibaldina”. Morrungiant po unu rigori non donau, chi a totus est partu craru. Ma su giogu de sa bocia est gosi: una borta a mei e una borta a tui.
Un’atra partida perdia chi ponit ancora prus in perigulu sa panchina de Massimilianu Allegri, chi giai in campionau e giai ocannu passau, no est amostendu cussu chi balint is giogadoris chi tenit a dispositzioni. C’est de nai ca sa sociedadi at decidiu de donai galu fidi a s’allenadori e ddu at fatu po bogi de Andria Agnelli: “Est unu de is tempus prus dificilis de candu soi presidenti, soi inchietu meda e mi ndi parit bregungia manna. Depeus pediri scusa a is tifosus chi si bregungiant de s’amostai”, is fueddus crarus de su presidenti de sa Juventus. Chi at fintzas aciuntu: “Non c’at peruna responsabilidadi individuali, est feti unu problema de truma. Allegri est e at abarrai s’allenadori de sa Juventus, sa sociedadi nosta at fatui s contus sempiri a s’acabbu de s’annu. Sa Juventus – at acabbau de nai – est una truma de otanta,noranta personis, chi depit tenni sa fortza de si torrai a ponni totu paris”.
Deludiu fintzas su Milan, batiu in su gironi E in San Siro de su Chelsea, e in custu casu puru po 2-0. Una partida chi at pigau un’andala trota giai de fatu de binti minutus candu s’arbitru tedescu Siebert at donau unu rigori a is inglesus e c’at stupau foras de campu Tomori. Rigori segnau de Jorginho e a sighiri su segundu gol de Aubameyang a serrai sa partida.
A s’acabbu de sa partida no at cuau is fueddus Pioli: “Apu nau a s’arbitru cussu chi pensaia candu est acabbada sa partida, non chistionu beni s’ingresu, ma creu de m’essiri fatu cumprendiri”, at spiegau s’allenadori milanista. Aciungendu: “Su fubalu est unu sport de cuntatu, no est mai orrubiu e no est mai rigori. S’intrada de Tomori in pissu de Mount no est nudda”.
Cun duas partidas ancora de giogai, sa Juventus est urtima in su gironi paris a su Maccabi a tres puntus, invecias su Milan est a cuatru puntus, comenti sa Dinamo Zagabria, in palas de su Salisburgo a ses e a su Chelsea a seti.
Màuru Mura
Mercuris, su 12 de Santu Aine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.goal.com/it/liste/maccabi-haifa-juventus-cronaca-tabellino-voti/bltf20b292e59bc6385
