Sa Camera de is Stadus Unidus at votau, cuasi totu, atrus agiudus , militaris, economicus e uminatarius a s’Ucraina de coranta miliardus de dollarus chi su presidenti americanu Joe Biden iat propostu. Is agiudus nous ant pigau 368 votus contras de is 57 chi non furint de acordiu, e cun probabilidadi meda ant essi votaus finas de su Senau sa cid ach’intrat.

Eris, in su fratempus, c’est stetiu s’atobiu intru de Màriu Draghi cun Joe Biden in sa Domu Arva, chi est stetia sa prima bisita de su presidenti italianu. Is dus capus ant cuncordau in cica de una via po sa pagi, in pissu de sa cali sa matessi Italia e totu s’Europa s’interrogant seriamenti. E sa necessidadi de averas, urgenti de sblocai is portus ucrainus in su Mari Nieddu po cicai de evitai, a su costau de sa crisi de s’energia, finas una crisi in pissu de sa cosa de papai. “Putin pensaiat de nosi dividiri, at faddiu”, at nau Màriu Draghi in s’atobiu cun Biden chi est durau prus de un’ora. “Sa gherra in Ucraina at a betiri mudamentus mannus in Europa”, at aciuntu su presidenti de su Consigliu, “fustis acanta e immoi seus ancora prus acanta e sciu ca podeus contai in s’agiudu de is Stadus Unidus, chi est unu grandu amigu de sa Ue e de s’Italia”.

In su fratempus funt erribas a setantaseti is dis de gherra e s’esercitu de is russus est cuncentrau in is caminu bia Slobozhansky e Donetsk cichendu de pigai pei bia Kryvyi, in s’ucraina de basciu: ddu scri su Stadu maggiori de Kiev in sa nota de su mengianu e torrada a pigai de s’Ukrainska Pravda. “Su nemigu non si frimmat e tenit comenti de obietivu is territorius de is regionis de su Donetsk, Lugannsk e Kherson e tenni su corridoriu intru de custas terras e sa Crimea chi est giai ocupada”.

Sa Russia est finas prenendu de bombas is regionis de Chernihiv in su nord e Sumy in su nord-est, dogna dì e sempiri.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.fanpage.it/esteri/di-cosa-parleranno-oggi-mario-draghi-e-joe-biden-a-washington/