Oi, giobia 13 de Santu Aine, si cumentzat is trabaglius in Montecitorio e in Palazzo Madama po fairi is presidentis de sa Camera e de su Senau, chi est sa prima cosa de fairi po po fairi partiri sa legisladura. A is 10 cumentzant is deputaus e a is 10,30 is senadoris.

De solitu sa prima nomina lompit de su Senau, aunia bastat unu votu in prus. Po cantu pertocat sa Camera, invecias, tocat a aspetai calencuna dì in prus: in Montecitorio, difatis, in is primus tres scrutinius serbit sa magiorantzia de is dus tertzus, e feti in segus si passat a sa magiorantzia assoluta.

De cantu si narat c’est giai un’acordiu in su centrudrestra, fait sciri su senadori de Fradis d’Italia Giuannibatista Fazzolari: “Po fairi su presidenti de sa Camera e de su Senau non ci funt problemas, eus agatau s’acordiu”.

Po su Senau su favoressiu est Ignatziu La Russa de Fradis D’Italia chi si dda giogat cun su leghista Robertu Calderoli. Abarrat stesiada Annamaria Bernini de Fortza Italia. Po sa Camera, chi su presidenti de su Senau non iat essi unu leghista, su nomini chi s’intendit de prus est cussu de Ricardu Molinari, fintzas poita s’atru probabili, Giorgetti, iat tenni unu ministeru. Un’atru nomini chi si fait est cussu de Antoni Tajani de Fortza Italia.

Fintzas po sa scuadra de guvernu, sighit a nai Fazzolari, “non ci funt problemas cun sa Lega e Fortza Italia, mancu in pissu de su nomini de sa Ronzulli”.

Oi c’est un’atru atobiu intru de is alleaus in Roma: “Cun Sirviu Berlusconi e Mateu Salvini nos eus a biri prus adduru, ma deu pensu ca su prus est fatu”, at nau Giorgia Meloni lompendu in is uficius de sa truma sua in sa Camera. “Mi parit chi is cosas andint beni, trabbagliaus e seus prontus, non podeus perdiri tempus poita sa situatzioni in Italia no est facili po nudda”, at aciuntu, donendu arregioni a Salvini ca narat ca giai de oi eus a tenni unu presidenti de su Senau nou.

 

 

 

Màuru Mura

 

 

Giobia, su 13 de mesi de ladamini de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.senato.it/home