Is tifosus de su Casteddu tenint sa spera in su coru de acabbai sa cuntierra po si sarvai de sa Serie B, giai dominigu chi benit, a ora de prangiu, in su Mapei Stadium de Regiu Emilia in sa partida contras de su Sassuolo.

Ma a intru de sa scuadra sarda non si fait perunu contu: tocat a binciri po si pigai tres puntus chi, comenti parit donendu una mirada a sa classifica, iant essi decisivus po abarrai finas ocannu chi benit in Serie A. Certu, a pustis, su 26 de mahu c’at essi finas sa partida cun sa Fiorentina, chi, sa spera est custa, podit calai in campu cun sa conca a sa finali de Conference League de su 29 contras de is grecus de s’Olympiakos. Ma is tres puntus, in dd’una manera o in s’atra depint lompiri. Ddu scit sa sociedadi, comenti aici ddu scint sa scuadra e totu is tifosus.

E ca sa partida de dominigu si possat binciri ddu scint finas is scumetidoris. Podit essiri unu signu. Difatisde is ses scuadras chi funt gherrendu po si sarvai, faint connosciri de Agipro, una sociedadi de scumissas, feti cuatru ce dda podint fairi. A nai adiosu a sa Serie A po ce dd’acabbai in Serie B, po is scumetidoris at essi cun probabilidadis medas su Sassuolo: is analistas de Planetwin e Betflag tenint fidi paga in is emilianus, chi s’agatant a su postu de 19, in pissu de 20, in classifica. Difatis benit donada intru de 1,10 e 1,15. Calencuna possibilidadi in prus benit donada a s’Empoli, chi po s’ora est indenanti de unu postu de su Sassuolo. Is toscanus benint donaus a 1,70, in su mentris chi su Frosinone s’agatat a 2,75.

Su Casteddu e s’Udinese, invecias, po chini scumitit, tenint prus pagu medas probabilidadis de ci calai: is sardus funt a 4,35 e is friulanus a 6. Chini parit a su seguru est su Verona: is venetus si podint giogai a 23 bortas su dinari chi benit scumitiu! Ant a tenni arregioni?

 

 

Màuru Mura

 

 

 

Mercuris, su cuindigi de maju de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://scommesse.commentierecensioni.com/scommesse-online-agenzia-differenze/