S’Universidadi de Helsinki, In Finlandia, at cicau de cumprendiri cali ratza de cani est sa prus abista de su mundu. Aici at studiau milli canis cun dexi test de abilidadi, fendu sa classifica de is prus inteligentis. Is arresurtaus ddus at, in segus, pubricaus in su Nature Scientific Reports.
Comenti si scit, su naturali de is calleddus non tenit nudda de ita biri cun sa ratza. Ma ci funt carateristicas e abilidadis chi, chena peruna duda, tenint un’origini genetica. E in pissu de custu ant studiau is scentziaus. Si sciat giai ca is calleddus piticus funt cussus prus barrosus, ma comenti funt postus in chistioni de inteligentzia?
Peruna duda po s’universidadi finlandesa: is prus abistus funt is Belgian malinois, calleddu de pastori belga e prus de una borta scioberau comenti cani politziotu, chi ant pigau 35 puntus in pissu de 39. Sighint in sa classifica is Australian Kelpie, is Labrador retriever, is Border colli e is Golden retriever. In sa positzioni de ses agataus is Hovawart, sighius de is Spanish water dog, is Shetland sheepdog, is English cocker spaniel, is Australian shepherd, is Mixed breed, is German shepherd e is Finnish lapphund.
Is provas de inteligentzia partiant de sa capassidadi de “ligiri” is cumandus de s’omini e de comenti lompint a una solutzioni de problemas in cambiu de cosa de papai.
“Sa parti manna de is ratzas teniat puntus de fortza e de debbilesa. Est a nai, su Labrador retriever est capassu meda de ligiri is cumandus de s’omini, ma non ateretantu a agatai una solutzioni po unu problema spatziali. Calencuna ratza, comenti su cani de pastori de is Shetland, a tentu arresurtaus ogualis in cuasi totu is provas”, narat sa scentziada Katriina Tiira. “Su belgian malinois at tentu arresurtaus mannus in chistioni de connoscentzia, pighendu votus artus in cuasi totu is provas”.
Màuru Mura
Mercuris, s’undixi de gennargiu de su 2023
Foto: https://dogsbestlife.com/dog-breeds/belgian-malinois/
