Custu est s’acordiu chi ant pigau Lega, Fradis d’Italia e Fortza Italia in s’atobiu de su centrudrestra po chistionai de is eletzionis de su 25 de cabidanni.
Unu de is nuus, difatis, fut cussu de chini faiat su presidenti, ma a cantu narant is bogis is tres partidus ant agatau s’acordiu. E custu est, duncas, chi, sempiri chi si binciant is eletzionis, a decidiri chini at andai a Palatzo Chigi po ghiai su Guvernu at essi su partidu chi pigat prus votus de is atrus dus.
Acordiu agatau finas po is circoscritzionis po is italianus chi funt foras de s’Italia, aunia ddu at essi una lista sola. Sempiri in s’atobiu s’est decidiu de cumentzai a trabagliai po su programa de presentai a sa genti.
In domu de is Steddaus, invecias, Grilllo, chi nd’at pesau su M5S, a su presidenti Conte iat airi nau ca balit ancora sa regula de non tenni un’atra possibilidadi de intrai comenti de parlamentari. “O aici o aici”, iat airi nau Grillo.
Ma Conte – de fatu chi sa nova dd’ant contada totu is midias – at coidau a nai sa sua: “Deu cun Grillo no apu chistionau e duncas sa nova non ci podit essiri. Dddu possu nai a bogi arta ca no est aici comenti mi narais. Teneus de cumbatiri una grandu bataglia totu paris po s’Italia, castiaus paris in sa matessi diretzioni”.
Sa lacana intru de is candidaduras po sa segunda borta – iat nau Conte chistionendu in Rai 3 – no est unu ‘diktat’: Grillo at tentu sempiri custa pensada, e deu pensu chi siat giusta. Est unu tempus delicau meda, unu tempus perou aunia calencuca esperientzia fata iat a giuai meda a su Movimentu. Seus chistionendu intru de nosu, tra pagu eis a sciri eita eus a fairi”.
Immoi lompint is fueddus de Grillo, chi funt grais che coronas in is scioberus de su Movimentu, giai postu mali de medas chi funt bessius comenti Luisu Di Maio, intrau in “Insieme per il futuro”.
Màuru Mura
28 de triulas de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://it.wikipedia.org/wiki/Beppe_Grillo
