Funt “chena” bandela. Ma funt fintzas cussus chi in su 2019 ant cumbatiu una gherra po su pretziu de su lati. Immoi is pastoris sardus funt prontus a una bataglia noa: su binti de custu mesi ant a lompiri in Casteddu po un’atra manifestada manna po cicai de difendiri su trabbagliu insoru e de is famiglias.
Sa decisioni dd’ant pigada eris a mengianu in su “Centro Congressi” de Tramatza in sa 131, aunia at atobiau genti meda: de innoi funt partius is morrungius prus mannus de su mundu de su sartu.
S’atobiu ddu ant aprontau Nenneddu Sanna e Giuanuariu Falchi, chi iant giai ghiau is morrungius de su lati fuliau in is caminus, cun a su costau Fabiu Pisu, Antoni Doa e Giuanniluisu Argiolas. A su cumbidu ant arrespustu pastoris medas chi ant prenu s’aposentu, genit meda in peis ca non s’agataiat cadira aunia si setziri. Est stracu su mundu de su sartu, non scit aunia batiri sa conca e non tenit is arrespustas chi iat a bolli.
Totu paris anti pediu is dimissionis de s’assessori regionali de s’Agricoltura, Grabiela Murgia.
Ma is problemas, chi ant essi postus in paperi de fairi lompiri in sa capitali sarda funt medas. Is aziendas, de is massajus e de is pastoris, sardas non c edda faint a sustenni is aumentus de is materias primas, chentza perunu agiudu de sa Regioni. In prus sa Sardigna est stetia penalizada in su pianu natzionali, chi guvernat su dinari chi erribat de s’Europa po custu setori po is cinc’annus chi ant a lompiri: a s’apellu mancat calencuna cosa comenti 600 milionis de eurus.
In segus c’est sa chistioni de su pretziu de su lati, chi giai est bessiu “ma depit essiri cuntratau a su cumentzu de s’annada e non de fatu”, narat Sanna
Aunia s’ata tenni sa manifestada? Galu est de decidiri: “Eus andai aunia ddus agataus”, aciungit una de is milli bogis de s’atobiu de Tramatza, e si cumprendit ca est chistionendu de is politigus…
Màuru Mura
Giobia, su 13 de Santu Aine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://altrasicilia.it/news/125-crisi-del-latte-la-protesta-dei-pastori-sardi-si-estende-anche-in-sicilia-agci-agrital-sostiene-le-istanze-dei-produttori.html
