In is listas de is Fradis d’Italia, in su collegiu proportzionale Lombardia 1, in is eletzionis de su 25 de cabidanni passau, at bintu Fabiu Pietrella, chi bivit in Parma, ma est nasciu in Carbonia e at biviu po annus meda in Bonorva, aunia torrat candu podit ca ddue tenit una domu puru. Imprenditori in su campu tessili, trabbagliat intru de Parma e Milanu, corantacinc’annus, presidenti natzionali de Confartigianato Moda, ddu at bofiu, po fortza, in Parlamentu sa segretaria Giorgia Meloni etotu.
“Politicamenti intru de mei e sa Meloni est stetiu amori inderetura, dd’apu connota in un’atobiu de Confartigianato, e mi dd’at presentada Daniela Santanché”, narat, su deputau nou Pietrella.
Pietrella tenit una storia de interessu mannu. Su nannai de parti de sa mamma est lompiu in Sardigna, in Carbonia, de fatu de sa guerra po sighiri su fradi Stevini Perati, allenadori brescianu mai scaresciu de is carboniesus. Stevini est abarrau in sa panchina de sa Carbosarda de su 1946 a su 1958, in seugus s’est setziu in is panchinas de su Casteddu, de sa Tharros e de sa Torres aunia est abarrau finas a su 1976. Un annu a pustis, in su 1977, est nasciu Fabiu Petrella, chi de Carbonia est lompiu in Bonorva po sighiri sa mamma chi fut maista de scola e su babbu chi fut presidi de su liceu.
“Bonorva est sempiri in su coru miu – narat –. Ddue tengiu amigus meda e comenti ce dda facu ddue torru sempiri. Mamma invecias ddue lompit dogn’annu. S’acapiu de sa familia mia cun sa Sardigna nemus ddu podit scapiai”. Fabiu Pietrella a pustis su diploma in su liceu classicu de Bonorva at studiau in Parma aunia s’est laureau in economia aziendale. De tandu at cumentzau a trabbagliai finas a diventai unu imprendidori famau e immoi tenit s’ocasioni manna de si setziri in is bancus de su Parlamentu italianu.
“Un’impignu mannu, ma chi mi pragit giai meda – narat sempiri Pietrella – dde seguru non mi ap’a scaresciri de sa Sardigna”.
Màuru Mura
Mercuris, su cincu de Mesi de Talamini de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.confartigianatoparma.it/archives/8412
