Una bella punitzioni de Mancosu at illudiu su Casteddu chi est torrau in campu in segundu tempus cun sa partida chi pariat in calada. Invecias, su Venetzia arrespundit inderetura e agatat su paregiu cun Pohjanpalo chi ponit sa bocia a is palas de Radunovic.
Venetzia meda prus barrosu e amostaiat de bolli binciri custa partida intru de duas de is caladas in Serie B. Cun is minutus chi passaiant su Venetzia pigaiat sempiri prus campu e in pagu tempus at fatu atrus dus gol.
Su primu lompit candu is piciocus de Liverani perdint sa bocia a centrucampu, su russu Cheryshev, intrau de pagu in campu, segnat de fatu chi Radunovic iat parau un’atru tiru. Sa de duas, e tres in totu, erribat sempiri de parti de su giogadori russu e aici is lagunaris s’agatant de averas cun sa partida in calada. In su 1-3 puru no est partu chena curpas su portieri casteddaiu.
Su poker erribat a su minutu otantunu: galu Cheryshev donat una bocia a Haps chi, apustis airi fatu totu su campu, fait su gol de cuatru.
Si ponit mali su campionau de su Casteddu chi galu, de fatu de is partidas giogadas no at donau su pensamentu chi possat “bociri” sa Serie B. Forsis calencunu si fut illudiu de is giogadoris fortis chi funt in sa scuadra, ma sa serie B est aici de sempiri: tostada, traitora, sempiri cun calencuna partida chi nascit in d’una manera e acabbat in un’atra.
In segus est beridadi manna chi contras de su Casteddu is atras scuadras donant su prus chi c’arrennescint e de prus puru. Immoi si cumentzat a chistioni dde ci stupai a Liverani, ma a parrer nostu no est custa s’andala de pigai. Serbit passientzia manna e a trabagliai prus de cussu chi est stetiu: seus segurus ca Liverani ce dd’at a fairi poita est unu capassu, comenti ddu at giai amostau in atras citadis. Conca a sa partida chi benit, ca cussu chi est sussediu non contat prus nudda.
Màuru Mura
Lunis su tres de Santu Aine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.rainews.it/tgr/sardegna/video/2022/09/liverani-dobbiamo-migliorare-sul-piano-tecnico-9781eb7b-1d66-425e-a0d7-0e0dcaedafa1.html
