Una dì de averas caglienti meda, cun Màriu Draghi chi lassat a innantis s’atobiu Nato de Madrid e Giusepu Conte chi bessit a su Quirinali po chistionai cun su presidenti de sa Republica Sergiu Mattarella.

Tirat aria de crisi de fatu s’intervista de su sociologo Dominigu De Masi, chi at scovaiu cosa nada de Beppe Grillo, chi naraiat ca su “premier” iat airi tzerriau su comicu pedendudeddi de “ci bogai Conte de su M5S, poita no est cosa chi balit”.

“Mai sussediu”, fait sciri Palatzo Chigi, ma oramai su nau pariat giai bellu che fatu. Conte chistionat de cosa de “Arriolu” e denuntziat su de si ponni in mesu de Draghi.

Conte cun Draghi si funt crarius po telefunu, ma no est bastau. A pustis Conte est bessiu de Mattarella in d’un’atobiu chi est durau sonumancu un’ora.

Su “premier” tenit fidi: “Cun Conte nosi eus a biri coitendu, su guvernu no erriscat nudda.

Su tempus, insoma, est tot’atru che trancuillu e sa sensatzioni est ca is Steddaus siant lompius a bolli segai s’alleantzia, agatendu cussa scusa po lassai sa magiorantzia e a si preparai a custus mesis de campagna eletorali a s’opositzioni.

Is grillinus ponint in pissu de totu is chistionis de sempiri: de su Super bonus a su “salario minimo”.

“Nosu finas a immoi eus sempiri sustenniu e sigheus a ddu fairi, cun lealtadi, non cuendu momentus dificilli po nosu, chi nosi donant suferentzia. Soi abarrau chena fueddus – at acrariu Conte chistionendu de Draghi –. Eus sempiri spintu su guvernu po essiri protagonista in Italia e in Europa. Non si pensiaus chi ci podiant essiri finas custas telefonadas”.

Po immoi funt totu ciaciarradas, ma de seguru calencuna cosa de custas bogis at essi beridadi e calencuna cosa est movendusì. Is cidas benidoras nos ant a nai chi funt feti fueddus macus o chi est pesendusindi un’atru guvernu chena calencunu Steddau.

 

 

30 de làmpadas de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.agi.it/politica/news/2022-03-29/incontro-draghi-conte-sanare-spaccatura-spese-militari-16175295/