S’allenadori nou de su Casteddu Agostini, chi at pigau su incarrigu de Walter Mazzarri e depit cicai de non ci fairi calai su Casteddu in sa Serie B at cumentzau inderetura a trabagliai in Asseminello cun dus allenamentus cun in conca sa partida de dominigu chi benit in Salerno, cun sa Salernitana, chi podit balliri totu su campionau.

Eriseru est erribada s’uficialidadi po Agostini e po is agiudantis, chi funt, podeus nai chena farta, dus corus casteddajus: Andria Cossu e Tanielli Conti. Campu, palestra e tatica is primus trabaglius. Oi un’atru allenamnetu a mengianu e custu merì una mirada a sa partida de Salerno, aunia sa Salernitana recuperada sa partita cun su Venetzia chi non si fut possia fairi po mori de su Covid. Est a nai ca chi is campanus de Davidi Nigola bincint ndi giumpant is sardus e dominigu chi benit iat a tocai a binciri po fortza.

Walter Mazzarri, in su fratempus, narat ca no a is fueddus chi funt bessius in is giornalis po airi ofendiu sa scuadra e su presidenti, chi iant airi portau a ce ddu bogai po “giusta arregioni”.

“Apu ligiu, spantau, is novas de is giornalis, aunia deu iari nau fueddus chi mai e poi mai apu nau, e m’ofendint. A fuedddai est su trabagliu miu de bint’annus”, fait sciri s’allenadori toscanu. “Po custa arregioni – sighit a nai – soi custrintu a intervenni e a nai ca est totu faula cussu chi eis ligiu, e torru a torrai gratzias a totu sa scuadra po m’airi agiudau a cicai de sarvai su Casteddu”.

Ancora nudda est perdiu po su Casteddu, custu acabbu de campionau assimbigliat meda a cussu de ocannu passau candu su Casteddu de Semplici fut postu mali e teniat a innanti is campanus de su Benevento. Tocaiat a binciri, non pariat facili, ma cun d’una grandu partida si fut fatu cussu puru. Bastat a ci creiri e seus segurus chi Agostini at a tnni sa giusta manera de trasmitiri sa gana e sa barra, poita sa Sardigna non ci podit calai in Serie B.

 

 

5 de maju de su 2022

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.vistanet.it/cagliari/2017/07/23/auguri-ad-alessandro-agostini-bandiera-rossoblu-baluardo-difensivo-del-cagliari-cellino/