“Is pastoris sardus, chi difendiant su trabagliu insoru, ddus ant pigaus a cropus comenti funt lompius in Civitavecchia, is tifosus de su Napoli, invecias, ddus ant acumpangiaus finas a su stadiu e podiant fairi e nai su chi boliant: cali est sa manera de fairi?”.

Aici chistionat Ugo Cappellacci, parlamentari e responsabili regionali de Fortza Italia-Sardigna chi at fatu sciri sa presentada de un’interrogatzioni a su ministru de s’internu po cussu chi est sussediu in sa capitali sarda aunia s’est giogada sa partida intru de su Casteddu e su Napoli.

“In citadi ancora s’arregodant is cropus de sa politzia contras sa genti chi morrungiaiat, in su portu, po s’aliga chi erribaiat de sa Campania. Tandu non si fut chistionau de delicadesa”, sighit a nai Cappellacci.

“Sa Cuestura casteddaia narat ca ant fatu a custa manera po cicai de non fairi atobiai is tifosus de s’una e de s’atra scuadra. Ma non feti is tifosus si funt atobiaus prus adduru, ma s’est erriscau de fairi cravai is “ultras” in su centru de sa citadi. Custa manera de cumandai a postu a erriscu finas is politziotus. Non si cumprendit comenti candu totu su mundu depit cumbatiri cun is regulas po sa pesta custus movant e facant totu cussu chi bolint”.

Finas su parlamentari de Fradis de Italia, Sarbadori Deidda, at fatu sciri ca est prontu a pregontai a su ministru is maneras chi ant umperau: “Mi depit arrespundiri e bogliu arrespustas serias. No agatu peruna scusa po cussu chi est sussediu in Casteddu a innantis de sa partida: non si podit permitiri a is tifosus de andai de una parti a s’atra de sa citadi in custa manera”.

Fueddus tostaus finas cussus de su consiglieri comunali de Casteddu Fabritziu Marcello: “A innantis is amelessus e is crovongius, insegus fueddus legius po is sardus e is casteddaius, po non chistionai de candu ant cicau de intrai in is aposentus de s’Unioni Sarda. A pustis totu custu ddi donaus fsa possibilidadi de erribai in via Roma. Custa no est seguresa po sa citadi!”.

 

 

22 de friargiu de su 2022

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.sportmediaset.mediaset.it/calcio/cagliari/cagliari-napoli-scontrifuori-dallo-stadio-dopo-la-partita_46352920-202202k.shtml