De sa Regioni dinari friscu, coranta milionis de euros, po is pastoris sardus, po cicai de ddus agiudai in segus a is pretzius chi si funt pesaus de una pariga de mesis a cust’ala.
Sa mesura de s’agiudu fata de sa Giunta regionali erribat cun d’una aciunta a sa Finantziaria: “Poderaus s’impignu cun chini trabagliat in su sartu chi pedit, in giusta manera, un’agiudu po giumpai custa crisi – narat su guvernadori de sa Regioni Christian Solinas.
Aciungendu in segus: “Est un’agiudu chi lompit inderetura e in is urtimus annus unu de is prus de importu mannu. Non ci funt regionis meda chi agiudat aici meda su mundu de chini est in su sartu. Imoi funt sunfrendu meda meda ca est dificili a abarrai in su mercau a pustis chi dogna cosa chi ddis serbit tenit unu pretziu prus artu meda de a innantis. Seus trabagliendu po donai atrus agiudus a is massajus, cussus puru a terra po aumentus de totu cussu chi ddis serbit e tempus legiu. Funt totu mesuras chi erribant a pustis is cuatru milionis chi eus donau a chini pesat procus. Non eus scaresciu mancu Arborea, chi po nosu est una de is siendas meglius de sa Sardigna chi trabagliat beni meda in Europa”.
Is coranta milionis de sa Regioni funt aici dividius: 17 milionis e mesu po chini tenit bois e bacas e s’orrestu, duncas 22 milionis e mesu, po chini invecias est meri de brebeis e crabas.
“De seguru – sighit a nai su guvernadori – non si frimaus innoi. Su mundu de sus sartu e de su monti est po nosu una de is prendas prus mannas de sa Sardigna e de tempus meda aspetat agiudus po cicai de biviri in manera digna. Custu est feti unu de is primus passus chi eus a fairi. Teneus in conca sa pensada de torrai a fairi torrai is giovunus in su sartu. Is nostras non funt feti impromissas e eus sempiri fueddai cun custus trabagliadoris po cicai de cumprendiri sa situatzioni”.
23 de friargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: Archivio Domus de Janas
