“Ddu apu nau a is alleaus nostus e ddu nau fintzas a bosatrus chi seis sa scuadra de is Fradis d’Italia in Parlamentu. Ndi boleus pesai unu guvernu de importu e de livellu artu, chi partat de is cumpetentzias. Boleus fairi custu chena farta, non s’agatat logu po atras chistionis, chi passant totus is segundu pianu”.

Est cantu at nau Giorgia Meloni in d’un’atobiu cun totu is parlamentaris de Fradis d’Italia. In s’atobiu, durau prus o mancu un’ora, sa “leader” de is Fdl at torrau a nai ca s’at fairi agatai pronta: “Chi e candu su Presidenti de sa Republica, mi donat s’incarrigu, boleus essiri prontus e su prus allestru possibili, finas po tenni giai is nominis de is ministrus”.

“Eus a trabagliai – at assegurau – po partiri allestru, cumentzendu de is urgentzias comenti cussu de is bulletas cun pretzius de macus, po no si cuperai energia e po sa lei de bilanciu. S’obietivu nostru est a curriri, non podeus perdiri tempus, non eus mai scioberai calencuna cosa chi andit contras s’interessu de sa Natzioni”.

“Dogna borta chi eis imbucai in Parlamentu – s’avertimentu chi donat a is deputaus e senadoris – depeis pensai, a innantis de totu a totus is italianus chi su 25 de cabudanni ant bistu in nosu una spera e nos ant arregalau su benidori insoru, aici comenti depeis pensai a totuts cussus chi, invecias, non s’ant votau poita, calencuna borta, sa spera dd’ant perdia”.

Est sa prima borta, at arregodau sa Meloni fueddenduru, chi “sa drestra, cussa de aberu, tenit su poderi de sa coalitzioni. Est una cuntierra chi boleus binciri cun seriedadi e capassidadi”.

A s’acabbu, una pariga de fueddus ddus at intregaus a sa chistioni de Vox, su partidu spagnolu de sa drestra prus a drestra: “Eus a fairi comenti is amigus polacus. Nosu non castiaus is atrus, ma teneus una storia, una cosa a foras de totu cussu chi s’es amostau fintzas a ora. E iaus a bolli essiri nosu unu modellu po is atrus”.

 

 

Màuru Mura

 

 

Martis, s’undighe de Santu Gaine de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.editorialedomani.it/politica/meloni-incontra-parlamentari-governo-camera-tt03z9sq