Su Tribunali de Roma at cundennau a otu mesis su sutasegretariu de sa Giustitzia Andria Delmastro. Fut incurpau de airi scoviau cosas chi non depiat in relata a sa chistioni de s’anarchicu Alfredu Cospito.
“Sa spera est chi s’agatit unu giuigi in Berlino, ma non mi nd’andu”, is fueddus de Delmastro a pustis airi connotu cussu chi ant decidiu is giuigis. At chistionau de sa capitali tedesca po arregodai unu trabbagliu de Bertold Brecht, aunia unu molinargiu tenit sa spera de agatai unu giudici chi non facat partis.
Sa presidenti de su Consigliu Giorgia Meloni at inderetura fueddau de spantu, candu at connotu sa cundenna, aciungendu dapoi: “Mi pregontu chi is giuigis si siant frimaus in su miniscimentu de sa chistioni, ma su sutasegretariu Delmastro abarrat a fairi cussu chi fut fendu”.
Sa parti politica, a s’imbessi de cussa de guvernu, si fait intendiri: “‘Mi pregontu chi is giuigis si siant frimaus in su miniscimentu de sa chistioni’, narat Giorgia Meloni; ‘Chini tocat su Partidu Democratigu, po calencunu magistrau, andat cundennau’, narat Galeatzu Bignami; ‘Una sententzia politiga’, narat Andria Delmastro… Ma custa destra chi guvernat si ndi scarescit de chini non ce dda fait a si sanai e de chini non ce dda fait a pagai is bulletas e non cumprendit ca in dd’unu Stadu democratigu e de diritu custus fueddus andant contra is regulas”, narat sa segretaria de su Partidu Democratigu Elly Schlein.
Sa cundenna de Delmastro lompit a pustis chi sa Procura iat invecias nau de non ddi fairi nudda. Totu sa chistioni fut a ingiriu de is fueddus, de su friargiu de dus annus a oi, de Giuanni Donzelli, sempiri de is Fradi de s’Italia, chi in sa Camera iat fatu connosciri calencuna fueddada in su presoni de Tatari intru de Cospito e atrus presoneris cundennaus po camorra e ‘ndrangheta. Fueddadas chi a Donzelli iat scoviau su matessi Delmastro chi fut a intru de su Dap (Dipartimentu de s’amministratzioni de is presonis).
Màuru Mura
Cenarba, su bintunu de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.open.online/2025/02/20/processo-delmastro-caso-cospito-procura-roma-chiede-asoluzione/
