A pustis airi betau is ogus in sa partida de eriseru a merì de su Casteddu cun su Napoli in sa Unipol Arena (ta orrori de nomini po unu stadiu!) teneus duas cosas, chi funt seguras, de nai.

Sa de unu est ca su Casteddu at lassau atrus dus puntus, poita sa partida dda depiat binciri, po cussu chi at amostau in campu. Gana, barra, cursa, ominis postus beni in campu e tirus in porta, totu custu est stetia sa partida. Su Casteddu at fatu parti de su Napoli e at cumandau su giogu, s’est agatau a innantis de unu gol, po mori de unu sbagliu de Ospina, su portieri napoletanu. Est a nai ca una pariga de minutus in segus su Casteddu at tentu sa possibilidadi de torrai a fairi gol, a innantis cun Deiola e a pustis cun Baselli. Cun Deiola est stetiu bravu meda Ospina, Baselli invecias at faddiu chena curpas mannas, ca sa bocia fut unu pagu prus a palas de aunia s’agataiat.

Sa de duas est invecias ca su Casteddu tenit setziu in panchinu un’allenadori chi cumprendit meda de fubal e scit comenti fairi giogai sa scuadra. A pustis sa partida cun s’Udinese, cussa perdia po 0-4 in Casteddu, totus teniant eita nai po s’allenadori toscanu. In is social ddu annomingianta e ddu pigaiant in giru.

Mazzarri no iat fatu sa scuadra, si dda iat agatada e curpas ndi teniat paghissimas. At tentu coragiu mannu a ci stupai giogadoris famaus che Godin o Caceres e a fairi giogai piciocheddus comenti Obert, Altare e Lovato.

Ma est sa gana de curriri chi fait apilurtzai: eriseru is giogadoris de su Napoli s’agataiant finas tres casteddaius a ddus strobai.

De su mesi de gennargiu at intzertau totu e funt erribaus is puntus, finas chi sa classifica ancora no est posta beni, ma est feti chistioni de tempus, poita Mazzarri non ci calat in serie B e seus seguru ca a palas si ndi ponit non feti tres ma de prus. Scumiteus?

 

22 de friargiu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.youtube.com/t/restricted_access?blocked=4