Draghi est intru de dus caminus. Est sa dì prus longa po su guvernu de su presidenti beciu de sa Bce, chi est in crisi de candu una parti de is Steddaus no dd’ant donau fidi sa cida passada.
A is noi oras e mesu is fueddus de su capu de su Guvernu in su Senau. Narat sa sua e de fatu aspetat su chi tenint de nai totu is partidus a innantis de decidiri chi bessiri a su Quirinali po donai is dimissionis – custa borta chena peruna spera de torrai a palas – o andai a innanti. Su votu po sa fiducia at essi a merì, e cras Draghi at a chistionai in sa Camera.
Is signalis parint bonus. “At essi una bella dì”, narat su segretariu de su Partidu Democratigu Erricu Letta. Mateu Renzi est ancora prus seguru: “Ormai ddu scieus totus ca at abarrai Draghi, su solu problema est cumprendiri chi Conte at abarrai in sa magiorantzia”.
Is Steddaus funt dividius, cussus chi creint galu in custu guvernu bolint chi s’obergiat in is famaus “noi puntus”, amostaus de su “leader” steddau a su Presidenti po votai sa fiducia.
Eris Draghi at chistionau cun Letta, e a pustis a merì cun is capus de su centrudrestra
chi si narant “chena fueddus” po su cara a cara cun su segretariu democratigu.
Su centrudrestra at pediu a Draghi sa garantzia de s’unidadi natzionali e de non pigai in perunu pensamentu sonumancu seti de is noi propostas de is Steddaus.
E ca su votu si stesiat ddu narat finas unu post in Facebook de cussa chi invecias ddu aboginat dogna dì, Giorgia Meloni. Ponit in su social una cica de sa Swg aunia benit donau Fradis d’Italia a su 23,8% e scrit: “Mirai poita ddas funt provendu totus po non si fairi votai, custa est s’arregioni poita sa manca timit aici meda a is eletzionis”.
Po Di Maio is fueddus de Draghi, invecias, funt de unu grandu omini de is Istitutzionis: “Immoi non si podint agatai prus scusas: chini non donat sa fiducia andat contras is italianus. Immoi non serbint gioghigeddus, ma serbit amostai de sciri fairi”.
20 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.adnkronos.com/crisi-governo-draghi-oggi-in-senato-per-la-fiducia-diretta_2VoUV70cKbxoPwjI121UTn
