Su fiscu italianu at sercuestrau noi milionis de eurus a Titziano Ferro, chi bivit de annus meda in Los Angeles cun su pobiddu Victor Allen. Aici at decidiu in is dis passadas su Tribunali civili de Latina e sa nova dda scrit su matessi Latina Oggi. Est una nova becia poita sa “guerra” intru Ferro e su Tribunali fut una cosa chi andaiat a innantis de annus meda e iat nau sa sua finas sa Cassatzioni.
Sa decisioni de su Tribunali civili de Latina iat essi lompia cun d’una sententzia de su 15 de orgiolas passau. Sa curpa de sa Tzn Srl, aunia in palas ddue fut su cantanti est cussa de nono airi pagau s’Irpef, s’Irap e s’Iva in is annus 2006, 2007 e 2008.
In su 2020 sa Cassatzioni iat donau arregioni a sa sententzia de sa giustissia tributaria chi iat torrau a coa s’arrecursu de Ferro contras is cartellas de s’Agentzia de is intradas.
Una “guerra” durada annus in sa cali su cantanti iat perdiu. Is giuigis iant tentu finas su pensamentu de essiri ancora “prus malus”, poita si agataiant in denanti una persona famada, chi tenit prus connoscentzias de atrus po cumprendiri eita est giustu fairi e chi depit amostai, poita connotu e sighiu de medas, comenti si depit cumportai.
Su fiscu italianu iat sighiu su dinari meda chi beniat spostau de una sociedadi a s’atra da Tzn, intru de s’Italia e atrus logus strangius. Non feti, ma ddu at sighiu in is viagius aereus, comenti spiaciaiat su dinari cun is “cartas” e finas is presentzias subra su palcu e in sa televisioni.
S’Agentzia de is intradas de Latina s’est cumbinta ca su cantanti in su 2006 fut andau a biviri in Gran Bretagna feti po non pagai cussu chi depiat, gosendusi de leis prus lebias e acostiendusì a tres sociedadis strangias, olandesas e inglesas, cun socius in “paradisi fiscali”, po fairi acabbai inigui su dinari chi di erribaiat de is diritus de discus e televisionis.
19 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.youtube.com/watch?v=_KN_nyGehek
