Joao Pedro lassat su Casteddu a pustis de ot’annus chi an bestiu sa maglia de sa scuadra de sa capitali sarda. S’atacanti italu-brasilianu est in Turchia po s’acapiai po tres annus a su Fenerbahce.

In is urtimus tres campionaus Joao Pedro – chi in Sardigna at fatu in totu otantacuatru gol – at fatu sempiri prus de noi gol. Aici fendu est diventau unu de is prus fortis giogadoris de sa storia de su Casteddu e finas unu de cussus chi ant fatu prus gol in sa matessi storia.

Fut erribau in Sardigna de su Palermo, comporau de su presidenti Tomaso Giulini chi iat, cussu puru, apena comporau su Casteddu de Cellino. Fut lompia una calada in Serie B puru inderetura, ma s’annu in fatu cussu Casteddu, postu in campu de Rastelli fut torrau a bessiri in su campionau chi ddi cumpetit po storia e traditzioni

A su cumentzu Pedro fut unu chi giogaiat a palas de is atacantis, ma de fatu est passau a giogai comenti de atacanti.

Gol meda, comenti eus nau, propriu po custa arregioni, trexi feti ocannu passau, chi non funt serbius a nudda a sa scuadra po ce dd’acabbai in Serie B.

In s’ora chi fut aspetendu de si ponni de acordiu cun sa scuadra turca at cumentzau a s’allenai cun sa scuadra de Liverani, fendu sempiri gol in is partidas giogadas. Est abarrau foras feti in s’urtima partida, dominigu passau, ca is procuradoris fut agatendu s’acordiu finali. Immoi partit de averas po un’atra esperientzia professionali a tesu de sa Sardigna. In bonora e in bonasorti, si ddu minescit.

De unu chi si nd’andat a unu chi lompit, poita in su mentris est stetiu presentau unu giogadori nou: Antoine Makoumbou, binticuatr’annus chi erribat de su Maribor, aunia fut lompiu “de fatu a unu tempus de dificultadis ca po dus annus no agataia scuadra po giogai”. “Su tempus po agatai s’acordiu est stetiu longu, ma ddu eus agatau in pagus dis: soi allirgu meda de podiri bestiri sa maglia de su Casteddu”, is primus fueddus de su giogadori. “Sciu cantu s’aspetant is tifosus e sa spera mia est de podiri essiri de agiudu a sa scuadra. Deu m’intendu unu giogadori de mesu campu, ma soi prontu a fairi de totu po s’allenadori”.

 

19 de triulas de su 2020

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://www.napolimagazine.com/calcio/articolo/cagliari-joao-pedro-a-istanbul-vicina-la-firma-con-il-fenerbahce