Eris, candu furint is cincu in Italia, funt cumentzaus is Mondialis de fubalu in Qatar. Mai in sa storia de custu sport, chi allirgat su coru e ndi pesat passionis comenti nisciunu atru, unu Mondiali est stetiu giogau in su mesi de Sant’Andria po acabbai cuasi sa dì de Paschigedda. Immoi ci seus e totu sa cuntierra chi c’est stetia de candu fut bessiu, de sa parti de sa Fifa, su nomini de su Qatar est acabbada po donai logu feti a su campu.
Sa prima partida si dd’ant giogada sa scuadra de domu contras de s’Ecuador, ma a nai sa beridadi non c’est mai stetia partida ca is americanus de su sud funt partus centumila bortas meglius. Mai ant erriscau e antzis a unu certu puntu est partu chi si funt frimmaus acabbendu de giogai. S’Ecuador bincit sa partida po dus a zeru cun dus gol de Valencia a pustis chi unu si ddu iant tirau, non si scit beni poita. Cumentzant beni su gironi insoru is piciocus de Gustavu Alfaro, chi at serrau sa partida giai in su primu tempus. Mai una scuadra, meri de domu iat perdiu sa prima partida giogada, in totu sa storia de is Mondialis de su 1930 a immoi. Ma custus giogadoris parint pagu cosa de averas.
Su protagonista mannu de sa partida de su Al Bayt Stadium de Al Khor, est stetiu Enner Valencia: su capitanu e meri de s’atacu ecuadoregnu chi at fatu duas cosas chi mai furint sussedias: po sa prima borta unu gol de sa prima partida ddu iant fatu cun d’unu tiru de is undixi metrus e cun custus dus gol s’atacanti de s’Ecuador at segnau is urtimus cincu gol de sa natzionali sua in is mondialis, is atrus tres ddus iat fatus in Brasile in su 2014. Su giogadori de su Fenerbahçe at a innantis batiu su portieri Al Sheeb cun d’unu rigori e in segus cun d’unu bellu corpu de conca ddu at torrau a batiri de mesu de s’area.
Oi calant in campu is atrasa duas scuadras de custu gironi, su Senegal cun s’Olanda e giai de eris s’est cumprendiu ca at essi una cursa a tres po passai a is otavus: su Qatar at essi giai tropu chi facat unu gol in tres partidas. Scumiteus?
Màuru Mura
Lunis, su 21 de Sant’Andria de su 2022
Foto: https://www.calciomercato.com/news/enner-valencia-sblocca-i-mondiali-superman-il-flop-premier-e-il–53052
