Mancaiat feti s’uficialidadi. Est lompia: Guidu Angelozzi est su diretori sportivu nou de su Casteddu e su paperi scoviat ca ddu at a fairi finas a su 30 de làmpadas de su 2027. Nasciu in Catania, su 5 de friargiu de su 1955, Angelozzi tenit a is palas una esperientzia longa in su mundu de su fubalu: acabbau de giogai, in su cumentzu de is annus 90 at cumentzau cussa de dirigenti, diretori sportivu a innantis in su Atletico Leonzio e dapoi in sa Fidelis Andria, aunia est abarrau po ses annus, cincu de is calis in serie B.
A pustis is esperientzias cun Regiana, Catania, Sambenedetese e Perugia, in su 2005 passat a su Lecce, cun sa cali in su 2007-2008 bessit in serie A. In su 2010 ddu agataus in su Bari e dapoi in su 2014 pigat su bagagliu po lompiri in La Spetzia, aunia si giogat sa Serie A in is Play off, ma firmendusi a is cuartus de finali. S’annu infatu diventat Diretori de s’area tecnica de su Sassuolo e, in su matessi annu, sa scuadra emiliana lompit in positzioni de ses cun sessantunu puntus. E po cust’arregioni si giogat sa Europa League. Su 15 de cabidanni de su 2016 bincit sa partida de unu contras de sa scuadra basca de s’Atletico Bilbao, binta po 3-0. In s’istadi de su 2018 torrat a su Spetzia comenti de Diretori generali e tenit s’incarrigu de ghiai sa sociedadi e finas sa scuadra. In su annu de dus in La Spetzia ce dda fait a bessiri in Serie A. In su mesi de talamini de su 2020 passat a su Frosinone aunia si pigat su ruolu de diretori de s’area tecnica. Innoi oberit un’atra filera aunia si stagliat sa promotzioni in Serie A in su campionau 2022-2023 cun su sapntu de airi finas bintu su campionau.
Est omini chi cumprendit de fubalu ca connoscit custu munud de sempiri. “Beni beniu in Casteddu, diretori”, est su messagiu de sa sociedadi de Tomaso Giulini chi at a chistionai, in sa dì de cras, cun is giornalistas de su benidori de su Casteddu.
Màuru Mura
Mercuris, su binticincu de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.frosinonecalcio.com/conferenza-stampa-post-partita-direttore-guido-angelozzi/
