Spagna lamat, Argentina arrespundit. Est erribada a otu minutus de s’acabbu a innantis de is tirus de is undixi metrus sa vitoria de s’Argentina contras de sa Colombia in sa Copa America de fubalu.
Una finali chi sinnada de s’infortuniu de Lionel Messi, bessiu cun is lambrigas in is ogus in sa metadi de sa parti de dus de sa partida e cumentzada cun trigadiu medaq po mori de is incidentis in s’imbucu de su Hard Rock Stadium, intru de tifosus medas, massimamenti colombianus, chi ant provau de intrai chena de billetu, provendu a passai, cosa de non creiri de is impiantus de ventilatzioni.
Gratzias a su gol de su centravanti de s’Inter Lautaro Martinez, s’Argentina podit festai sa “Tripla Corona”, tres torradas internatzionalis una infatu de s’atra: a pustis sa copa America de su 2021 e su Mondiali de su 2022 in Qatar.
Su mericeddu in Florida fut cumentzau in su sciolloriu. Sa politzia at acapiau genti meda chi cicaiant de imbucai chena de billetu. Genti meda s’est intendia mali po su caglienti e po mori de su prenimentu de personis. Ma finas candu is aprontadoris ant oberu is imbucamentus no est andau meglius.
A pustis un’ora e binti est cumentzada, a is 3 e 22 de notesta in Sardigna, sa partida. Sa Colombia no est abarrada a castiai e antzis est cussa chi, po prima, est andada prus a canta a su gol cun dd’una bella atzioni intru de James Rodriguez, Luis Diaz e Jhon Cordoba. Lionel Messi, apustis unu tiru nd’at boddiu una stichida de pei chi ddu at lassau a terra po unu pagu de tempus. Ma dd’est andada peus in sa parti de dus candu at postu mali su pei et est depiu bessiri atzopiendu e candu s’est setziu in panchina s’est postu a prangiri.
Atras lambrigas finas de Angel Di Maria, ma custa bia po sa comotzioni, candu est bessiu a tres minutus de s’acabbu in cussa chi at essi s’urtima partida in natzionali. “Ia bisau de lompiri in finali e dda binciri, poi lassai aici”, at nau a s’acabbu Di Maria. Is argentinus iant segnau de pagu candu Lo Celso, cun sa bocia donada de Paredes, at passau a Lautaro Martinez po su tiru chi est ballia sa Copa.
Màuru Mura
Lunis, su cuindixi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.calciomercato.com/news/copa-america-argentina-campione-lautaro-entra-e-segna-ai-supplementari-83586
