Su Casteddu torrat in campu cras contras de su Perugia po una partida chi balit, de fatu sa retrocessioni in serie B de dus mesis a oi.

Po Liverani sa prima contras una squadra aunia at giogau candu fut giogadori. Ma candu fut piciocheddu s’allenadori nou de su Casteddu iat giogau cun sa scuadra de sa Primavera casteddaia. “Est bellu a ndi pesai is bisus e sa partida de cras est unu de custus -at nau Liverani chistionenduru de sa partida dun is giornalistas -. Soi lompiu in Casteddu ca fui unu piciocheddu cun meda spera e paghissimas seguresas: tandu sa Primavera non beniat sighia comenti sussedit immoi”.

Po sa prima partida in sa Domus Arena Liverani no at a podiri fairi giogai Rog, Nandez, Tramoni e Desogus. Deiola, invecias, at trabagliau cun s’orrestu de sa truma. “Ma est una situatzioni non noa – at nau su “mister” – at a giogai chini s’est allenau de sighiu. In s’aria s’intendint cosas bonas”.

De fatu de Rog, chi at decidiu de abarrai (“unu giogadori de atra categoria, at nau sempiri Liverani), immoi iat a podiri cunvinciri finas Nandez a abarrai: “Scit cantu custa citadi ddi bogliat beni comenti de omini e de giogadori – at sighiu a nai – chi abarrat innoi depit essiri unu de cussus chi depint essiri sighius, massimamenti de is prus giovunus. Ddu aspetaus, issu calencunu signali ddu at donau, est unu piciocu che bolit torrai a donai a sa citadi”.

Lapadula cun Pavoletti “podint giogai paris o una borta a cadunu – est sempiri Liverani chi fueddat – Est craru ca, de fatu, prus genti a innanti teneus prus depint curriri. Pereiro depit diventai unu ‘leader’, finas citiu, ma podit essiri determinanti. Ddu connosceus beni comenti de tecnica, dda depit acabbai de si frimai e po custu ddue seus trabagliendu”. “Po immoi totu est andendu beni, ma tocat a donai crobba manna poita sa B est tostada meda, depeus gherrai dogna partida, ma parit ca is piciocus custu ddu apant giai cumprendiu”.

 

 

Màuru Mura

 

 

4 de austu de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.avvenire.it/agora/pagine/liverani