Su Casteddu est sarvu e finas ocannu chi benit at a giogai in Serie A. Sa nova de oi est de cussas chi allirgat su coru a dogna sardu e finas a chini de su giogu de su fubalu non dd’interessat nudda. Torrendu a donai una mirada a su cumentzu de su campionau est unu spantu, ca a pustis noi giornadas, su Casteddu, s’agataiat in s’urtima positzioni cun feti tres puntus. At tentu arregioni, comenti de sempiri, Claudiu Ranieri chi naraiat a tenni passientzia manna.
Eris in Regiu Emilia cun su Sassuolo est stetia festa manna, massimanenti de candu a innantis Prati e dapoi Lapadula ant permitiu de binciri sa partida. Non podiat essiri che aici. Depiat acabbai in custa manera. Spantosa sa genti sarda chi est lompia de dogna logu de s’Italia po donai fortza, fidi e spera a is piciocus de Ranieri.
S’allenadori romanu est su bincenti mannu: in dus annus nd’at portau is orrubius asulus de sa Serie B a sa Serie A e oi ddus at sarvaus.
Est a nai, a dogna manera e a non si ndi scaresceri, ca tifosus pagus sabius e cun pagu sali in ciorbeddu, po tempus meda, ocannu mascamenti candu su Casteddu at perdiu calencuna partida de sighiu, ant tentu calencuna duda in pissu de Ranieri: cosas de macus.
Cun sa partida perdia eris est, invecias, su Sassuolo, po immoi a c’acumpangiai sa Salernitana in serie B. A pustis dex’annus de sighiu in sa Serie A, is emilianus ci calant e, a su cumentzu de su campionau, nemus ddu iat airi nau. Dominigu chi benit eus a connosciri s’atra scuadra chi at a fairi cumpangia a is emilianus e a is campanus e nd’at a bessiri intru de Verona, chi a dogna manera chi bincit cras cun sa Salernitana si ponit in sarvu seguru, Udinese, Frosinone e Empoli. A custu puntu totu fait creiri ca s’Empoli est sa scuadra prus probabile. Ma sa bocia est tunda e at arregalau sempiri spantus!
Màuru Mura
Dominigu, su digianoi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=nkt_wMkmxGo
