In Italia at giogau, e fintzas beni meda candu ddi teniat gana, cun su Piacenza, in serie B de piciocheddu, cun su Casteddu, cun sa Roma, cun s’Inter e un’atra borta cun su Casteddu. At fatu dinari meda gioghendu a fubalu Radja Nainggolan, ma dogna tanti ddi partiat su bremi de corru e ndi cumbinaiat calencuna de is suas. De dus annus est torrau in Belgio aunia est nasciu de mamma belga e babbu indonesianu, po giogai a innantis cun s’Anversa e in segus cun su Royal Antwerp Fc.
Eris sa politzia de Anversa ddu at acapiau, poita, comenti narat su giornali belga Het Nieuwsblad , su centrucampista est inincurpau de airi guidau cun d’una patenti chi in Belgio non balit.
Su Ninja, comenti est stetiu annomingiau in Italia, si ligit in su giornali est stetiu firmau de una patuglia de politzia in su corrunconi intru de Noordersingel e Schijnpoortweg in su mentris chi fut guidendu sa Mercedes sua.
De su cumpudu de sa politzia est beniu a foras ca iat superau, de pagu, unu tempus aunia non podiat guidai, ca ddu iant aciapau imbriagu, pagu tempus a pustis de essiri lompiu in Belgio. Nainggolan iat airi depiu fairi un’esami po torrai a pigai sa patenti. E non ddu at fatu. Su giornali online scrit is fueddus de Wouter Bruyns, portabogi de sa politzia de Anversa: “Nainggolan, at nau, est stetiu acapiua e interrogau. Sa machina sua est suta secuestru. Sciaus ca guidaiat su matessi fintzas chi non teniat sa patenti”.
A pustis totu is verificas de su casu, su giogadori est stetiu liberau.
Una ndi fait e centu ndi pensat, dogna tanti ddu becant, ma cussu chi at amostau in campu non si podit scaresciri. Ca fut una conca maca si connosciat de sempiri e in Italia puru no est chi apat fatu de totu po fairi a bonu. In Casteddu benit arregodau comenti unu de is prus bravus giogadoris chi apant bestiu sa maglia orrubia e asula, ma innoi puru, bortas meda, at fatu chistionai prus po cussu chi amostaiat foras de campu chi non cussu chi faiat comenti de giogadori.
Màuru Mura
Giobia, su treixi de Santu Aine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.tuttomercatoweb.com/calcio-estero/nainggolan-arrestato-in-belgio-fermato-alla-guida-ha-mostrato-una-patente-non-valida-1742361
