Dolu mannu in totu su mundu po sa morti de su Paba Franciscu. Si nd’est andua in punta de pei eris a mengianu, a is seti e mesu, po mori de unu raju, a su cali est sighiu su frimamentu de su coru: sonumancu aici si ligit in is paperis uficilais in pissu de is arregionis de sa morti. In su 2022, Franciscu, iat fatu connosciri is volontadis suas e giai si connoscioiat su disigliu de essiri interrau a suta de terra in Santa Maria Maggiore. Est finas e a nai ca sa tumba at essi pagada de unu benefatori chi at abarrai in s’umbra chena si fairi connosciri.
Jorge Mariu Bergoglio, aici comenti si lamaiat a innantis de diventai Paba, fut nasciu in Buenos Aires su 17 de mesi de Idas de su 1936 e duncas iat lompiu is otantotu annus de idadi. Sa familia de is arreignis de seguru non fut errica ca, difatis, de su Piemonti si fut stesiada bia s’Argentina, in su 1929, in cica de stedda ‘ona. Franciscu, in is contus de sa Cresia, est su Paba de dus a si morri a una idadi aici manna. Feti Leone de Treixi, Paba de su 1878 finas a su 1903, fut mortu prus a beciu, candu de annus nd’iat lompiu giai norantatres. Candu a Franciscu ddu ant postu in is pumus artus, dapoi de sa rinuntzia de Benedetto de XVI, de annus ndi teniat setantases e su matessi naraiat sempiri: “Pensu de non abarrai prus de cuatru o cinc’annu. Non sciu comenti bosi ddu spiegai, naraus ca est una sensatzioni chi tengiu a intru”. Ma, su tempus, non dd’at doanu arregioni, poita est abarrau comenti de ghia de sa Cresia Catolica giai po dox’annus. Sabudu chi benit ce ddu ant a interrai e intru de sa genti chi at a lompiri po ddu saludai finas, a faci manna, Donald Trump.
A pustis, intru de su ses e su dexi de maju, s’at a oberri su Conclavi po fairi su Paba nou. Ant essi centu trintacincu is cardinalis chi ant a votai e centu de otu de custus pesaus de su matessi Franciscu.
Màuru Mura
Martis, su bintidus de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.openprisma.it/grazie-papa-francesco-ora-tocca-a-noi-imparare-ad-amare-per-cambiare-la-storia/
