Cuarta partida perdia po su Casteddu in custu maladitu campionau de serie B. Bincit s’Ascoli po 2-1 e a decidiri funt is gol de Dionisi e Pedro Mendes po is meris de domu e de Pavoletti po su Casteddu.

Liverani scioberat Capradossi cun Pavoletti po ddus fairi giogai a su postu de Goldaniga e Mancosu chi funt abarraus in Casteddu, is atrus noi funt is matessis chi dominigu passau iant bintu cun su Brescia.

Sa bocia, a su cumentzu de sa partida, dda poderant sempiri is piciocus de Liverani, ma de tirai in porta mancu s’umbara. Passada sa mesora de giogu eriibat su machioiri de sa difesa, fintzas a s’ora perfeta,: de unu lanciu de un ascolanu Altare cun Capradossi lassant chi sa bocia lompat a Radunovic, Lungoyi si ponit in mesu e aciapat sa bocia e acabbat in terra tocau de su portieri sardu. S’arbitru Aureliano non podit fairi atru che donai su rigori a is marchigianus chi Dionisi segnat: portieri de una parti e bocia de s’atra.

In su segundu tempus s’Ascoli fait intrai Falzerano a su postu de Adjapong e inderetura si fait intendiri. A pustis de unu cuartu de ora ci provat su Casteddu, ma su tiru cun su pei mancosu de Falco est artu.

A metadi de su tempus Liverani cicat de donai una scossa: bessint Falco cun Di Pardo e intrant Millico e Lapadula, chi andat a innanti a su costau de Pavoletti, e Nandez si spostat prus a palas. A sa mesora tocat a Barreca cun Rog a intrai po Carboni cun Deiola. Su Casteddu cicat de fairi sa partida, ma a dexi minutus de su norantesimu est un’atra faddina de Radunovic a fairi segnai is ascolanus cun Pedro Mendes.

A nudda serbit su gol de Pavoletti a cincu minutus de s’acabbu de sa partida. Su Casteddu torrat a domu cun prus feli che meli, ma su campionau de serie B est aici, candu totu parit perdiu bastant una pariga partidas bintas de sighiu po artziai a is pianus artus: tenit totu sa scuadra de Liverani po ci provai.

 

 

 

Màuru Mura

 

 

Martis, su 25 de mesi de Talamnini de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.repubblica.it/sport/calcio/serie-b/2022/10/24/news/ascolicagliari_21_dionisi_e_pedro_mendes_portano_i_bianconeri_a_1_dalla_zona_playoff-371540856/