Davidi Nicola non ci calat sa parti de unu de sa partida cun s’Inter de sabudu a merì, aunia su Casteddu nd’at boddiu dus gol chena fairi resistentzia. “Seus calaus in campu cun barra pagu e no eus cumprendiu, massimamenti in su gol de dus chi abbisongiaiat a si fuiri unu pagheddu a innantis”, is primus fueddus de s’allenadori de su Casteddu a pustis de sa partida cun s’Inter perdia po 3-1 in su Meazza de Milanu. “De seguru no eus giogau comenti in sa parti de dus, aunia eus fat ubeni meda. Est rinas a nai ca candu fustis gioghendu pagu eus tentu sa possibilidadi de paregiai sa partida cun Piccoli. Intru de sa parti de unu e de sa parti de dus nosi seus naus ca podiaus difendiri e atacai cun coragiu, ca finas a tandu non ce dda iaus fata. E, invecias, in sa parti de dus ce dda eus fata e m’est pragiu de prus meda. Ma no est serbiu finas poita Bisseck cun dd’unu bellu corpu de conca at fatu acabbai sa partida. Fut dificili meda a dda torrai a ponni in peis ca s’Inter ddu scieus totu cantu est forti”.
A Nicola abarrat s’amargura, cussa de candu De Vrij at sarvau su gol dapoi de unu tiru de Luvumbo chi iat giumpau finas a Sommer, mancaiant tandu trexi minutus a s’acabbu. “Forsis ce dda faiaus a ndi pesai calencunu problema a s’Inter”, narat s’alleandori piemontesu. Chi, a borta sua, torrat a chistionai de su mudamentu de Casteddu intru de is partidas: “Eus provau, po s’urtimu cuartu de ora de sa parti de unu e po totu sa parti de dus de nosi giogai sa partida nosta. Sa scuadra connoscit beni comenti si depit giogai, seus cuntentus po comenti eus giogau po un’ora poita seus lompius in Milanu po cicai de fairi puntus. Sa lastima est ca tocat a ligiri beni is situatzionis, poita candu faddis cun dd’una scuadra comenti de s’Inter, a s’acabbu dda pagas”.
De su viagiu de Milanu su Casteddu ndi torrat cun nudda in manus, ma cun indicus bonus, prus che a totu castiendu a sa partida de su Lunis de Pasca Manna cun sa Fiorentina.
Màuru Mura
Lunis, su catodixi de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=ZOd2UVDQhHU
