Sa morti de su presidenti Ebrahim Raisi, spaciau po mori de unu incidenti in elicoteru dominigu passau in is montis de s’Azerbaigian, cumpartzit in dus sa genti de s’Iran.

A un’ala, sa genti chi tenit fidi manna a is cumandus de sa Republica islamica est donendu croba a dogna cosa chi pertochit s’arregodu de Raisi. Ddu fait in is social e massimamenti in is atobius, aprontaus in prus de una citadi, po ddu arremonai cun totu is onoris. Est sussediu, po ndi nai una, in Tabris, aunia genti meda (si chistionat de migliaias e migliaias) s’est atobiada po una tzirimonia pubrica de arregodu, in su mentris chi est aspetendu s’interru, chi at essi cras, bintitres de maju, in Mashhad, sa citadi de sa parti de su pissu de s’Iran aunia su presidenti iranianu fut nasciu su catodixi de mesi de Idas de su 1960.

Raisi fut presidenti de s’Iran de su tres de austu de su 2021 e fut su ‘ennuru de su capu de sa “pregadoria de su cenarba” e de su santuariu de s’Iman Reza, Ahmad Alamolhoda.

Torrendu, a dogna manera, a sa chistioni de su cumpartzimentu de sa genti iraniana, est a nai ca a s’atra ala, invecias, sempiri in pissu de is social s’agatat atra genti meda chi scrit in malu modu de Raisi. Mascamente s’arregodat sa chistioni de su bocimentu de medissimus presoneris politigus in is annus otanta e is violentzias mannas umperadas  a sa genti chi morrungiaiat contras de su guvernu iranianu. E non mancant nemancu scritus aunia sa genti si narat allirga e cuntenta de cussu chi est tocau a Raisi.

Po custa arregioni, su procuradori generali de s’Irana Mohammad Kazem Movahhedi Azad at cumandau una serrada crara po sa genti chi scrit contras de su presidenti mortu e de is atra genti chi s’agataiat in pissu de s’elicoteru.

Po cussu chi narat sa Bbc, su matessi procuradori at cumentzau a pediri is acapius de chini s’est allirgau a pustis scipiu de sa morti de Raisi.

 

 

 

 

Màuru Mura

 

 

 

Mercuris, su bintidus de maju de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.adnkronos.com/internazionale/esteri/morte-raisi-inchiesta-su-incidente-iran-in-lutto-oggi-funerali_4TwrCBATeHDioXdUvQOP55