“Custa est una bataglia chi mi onorat, Casteddu est sa citadi mia e nosu eus a trabbagliai poita possat giumpai si dificultadis chi s’agatant”. Aici Alissandra Zedda in sa presentada de sa candidaru sua po diventai sindiga de sa capitali sarda. Ma a innantis chistionat a su Partidu Sardu de Atzioni, su solu partidu de su centru drestra chi no est de acordiu: “Su fueddai podit essiri finas tostau, ma sa spera est chi, de inderetura, sa coalitzioni siat unia”. Alissandra Zedda, una vida cun Fortza Italia e immoi acanta meda a sa Lega de Mateu Salvini, spiegat chi po amministrait tocat a tenni “s’impignu prus mannu e sa passioni po su territoriu, is citadinus, is atividadis cumercialis, su mundu de su sociali e de totu is atras partis de sa comunidadi nosta”.
Casteddu, at arregodau, “est su fronti de una citadi metropolitana, sa mirada est ci ci siant is cunditzionis po ndi pesai errichesa, custu interessat a is citadinus”. Oi, “cumprendu is problemas, a dogna manera candu s’erricit un’eredidadi abbisongiat a pigai totu, cichendu de dda valorizai”. Su centrudrestra a is regionalis at perdiu poita su sindigu Truzzu est stetiu scrocorigau de is casteddaius. Comenti torrai a cuberai chini s’est stesiau? “Abbisongiat fairi cumprendiri ca su centrudrestra est galu sa fortza meglius e sa spera est chi ddu cumprendat finas su Partidu Sardu de Atzioni”.
Alissandra Zedda, unu contu mannu cun Fortza Italia, immoi s’est acostiada a sa Lega. Ant a cumprendiri is casteddaius? “Sa presentzia mia innoi cun s’orrestu de sa coalitzioni est sa spusta mia. S’acostiamentu miu a sa Lega est ca ndi soi cunvinta. Sa morti de Sirviu Berlusconi oi m’at fatu pigai atras pensadas, ma deu mi soi sempiri presentada sempiri comenti una de totu su centrudrestra. A dogna manera a innantis lompint is casteddaius, is pensadas politigas feti a pustis. E arregodu ca seus paris giai de su 1994”.
Màuru Mura
Mercuris, su tres de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sardegna/notizie/2024/01/19/sardegna-alessandra-zedda-rientra-nel-centrodestra-con-truzzu_299bb8d8-5b0c-4c06-a04f-7b1763865f08.html
