Sa pensada po ponni Sirviu Berlusconi comenti Presidenti de sa Repubblica parit ca est faddia e s’est frimada. Non ci funt is numurus, aici parit, torraus a nai. A ddu nai chena meda fueddus est Vitoriu Sgarbi, chi in custas cidas at agiudau su capu de Fortza Italia a cicai de chistionai cun chini iat depiri votai po su Quirinali.
“Eriseru Berlusconi fut tristu meda”, is fueddus de Sgarbi intendius in s’arradiu in sa trasmissioni de Lauro e Gepi Cucciari, “Un giorno da pecora”, in Radio Rai !.
“Ci depit essiri calencuna cosa chi no andat po Berlusconi”, at a sighiu a nai su deputau, “poita est abarrau in Milanu po si primai unu pagheddu. At essi pensendu chi ndi podit bessiri beni de custa situatzioni e at essi pensendu a un’atru nomini chi ddi andit beni”.
Cucciari cun Lauro ddi pedint unu nomini e Sgarbi arrespundit inderetura: “Mattarella ddu preferita a Draghi de seguru”. Sgarbi s’atra dì at chistionau cun Berlusconi: “Su problema no est chi Salvini bogliat fairi un’atru nomini. Su problema est chi su nomini, chi Salvini bolit fairi, pragiat e ddu facat Berlusconi”.
Ma tandu est acabada de averas? Non c’at mancu una spera? “Depeus nai sa beridadi, sa pensada de Berlusconi in su Quirinali est frima”.
Sa carta de giogai parit chi siat feti cussa de Renzi: “Chi a s’urtima ora Berlusconi chistionat beni cun Renzi po is votus de Italia Viva est fata. Ddi mancant centu votus, feti cun cussus de Renzi ce dda podit fairi. Finas chi deu mi pongiu a telefonai a totu is deputaus de Italia Viva mi ant a arrespundiri mancu sa metadi e a dogna manera no iant a bastai”.
De Arcore, a pustis is fueddus de Sgarbi, faint invecias sciri ca su Cavalieri est “trancuillu e ancora seguru” a sighiri su bisu de diventai presidenti de sa Repubblica. Chini ddi est a su costau narat ca imoi est cussu a umperai su telefunu e non si fait agiudai de atrus… ce dd’at a fairi a cunvinciri is eletoris?
19 de gennargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.crashdown.it/2014/01/43653-berlusconi-per-la-prima-volta-senza-trucco-ecco-la-foto/
