Un’unda de colori fucsia est cussa chi oi, otu de martzu, festa de sa femina at a lompiri in totu s’Italia, de sus finas a basciu, cun is isulas puru. In Casteddu, Catania, Palermu, Alessandria, Genova, Venetzia, Pisa e Napoli, feti po fairi su nomini de calencuna citadi, at a calai in is prassas e in is orrugas “Non una de mancu”, su movimentu de is feministas e “transfeministas” chi promovit sa lota contras de sa violentzia de is ominis in pissu de is feminas e contras dogna violentzia.
Is fueddus scioberaus po custu 2023, s’atobiu est su de seti, funt “Chi nosi frimaus nosu, su mundu si frimat”. Sa pensada prus de importu est difatis unu scioperu contras de sa guerra, su disacatu de sa natura, ma finas contras s’ideologia de “Deus, patria e familia” de su Guvernu e contras dogna forma de ratzismu.
Una manifestada po aboginai is diritus de “aurtiri liberamenti e chena depiri pagai, unu redditu de autodeterminatzioni, trabagliu pubricu e po totus, e po ndi tirai is làcanas a is Stadus e donai sa possibilidadi a totus de andai de una parti a s’atra”, faut imparis “a is feminas curdas, de s’Afghanistan, de s’Iran e a is feminas chi in totu su mundu funt gherrendu po una vida libera”.
In Sardigna est Terranoa a si moviri prus de atras citadis. De oi finas a pusti cras ant aprontau atobius medas. Cras, de is noi oras de mengianu, in su Museu Archeologicu, sa dì s’at a oberri cun sa mostra de “Is mamais de sa Costitutzioni. Contus de democratzia”, apariciada de Luisa Sassu de s’Anpi Sardigna e de s’Anpi de sa Gaddura. At a sighiri sa presentada de “Interviste impossibili a tre donne della Resistenza”, trabagliu apariciau de is discientis de sa scola de Telti e cun sa ligidura de is “Dichiarazioni delle madre costituenti”.
Pensada manna, ca is augurius nosi parint feus, a totu is feminas sardas, massimamenti a chini umperat sa limba.
Màuru Mura
Mercuris, s’otu de martzu de su 2023
Foto: https://www.salernotoday.it/social/sciopero-globale-transfemminista-8-marzo-2023.html
