In Aristanis is aposentus po is malaidus de cancru est a erriscu de non ce dda podiri fairi prus. Ant frimau s’imbucu de is patzientis po mori ca, is duas dotoressas chi ddue trabbagliant, non ce dda faint a si fairi carrigu de atra genti. A sa sola depint giai sighiri 520 personis.
Su primariu, Luisu Curreli, duncas s’est bidu custrintu a fairi girai unu paperi, a totu s’orrestu de su spidali, aunia si narat ca is imbucus nous funt de frimai. “Non teneus peruna seguresa de candu custa situatzioni at a podiri mudai – at scritu – non scieus chi e candu ant a lompiri atrus dotoris, duncas non si podeus pigai in carrigu atra genti”. In is mesis passaus, a pustis unu cuncursu de Ares, “nemus at sceberau Aristanis comenti de logu aunia trabbagliai”.
Unu disisperu, po totus, chi s’amostat massimamenti in is fueddus de una femina chi chistionat de sa chistioni de su babbu: “Eus perdiu unu mesi in s’ra chi aspetiaus chi nosi neressint chi e candu babbu iat airi possiu cumentzai is curas. E cun dd’unu cancru in corpus trinta dis non si podint sperdissiai in palas de sa burocratzia”.
“A su cumentzu de su mesi de Sant’Andria passau babbu ddu iant castiau in su Santu Martinu de Aristanis e dd’iant nau ca iat airi depiu cumentzai sa chemioterapia”, sighit a contai sa femina. A innantis, a dogna manera, serbiant atrus esaminis fatus a s’acabu de su mesi in Casteddu. “In su fratempus – aciungit sa picioca – eus pigau cuntatus cun sa Ieo de Milanu chi nos ant nau de cumentzai inderetura is curas. De tandu est sussediu ca sa dotoressa chi nosi fut sighendu si nd’est andada de Aristanis, lassendu feti is paperis a is collegas, ma non ce dda eus fata a chistionai cun nemus”.
Sa femina arregodat comenti siat passua unu mesi e ancora no est stetia cumentzada peruna cura “Oi eus andai a su Businco de Casteddu e torraus a su cumentzu”.
Màuru Mura
Mercuris, su cuatru de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.laneuroriabilitazione.it/centro/ospedale-san-martino-oristano/
