Su Casteddu propriu non ce dda fait a binciri una partida. Sabudu puru cun su Pisa, in domu, ce dd’at fata a torrai a pigai una partida chi pariat andenduru mali, chi non peus. Ma de binciri propriu non si ddi chistionat, immoi erribat su pasu de su campionau, aunia si podint torrai a biri schemas e forma de is giogadoris, ma chi non si donant eita fairi erriscant de non fairi prus cussu campionau de protagonistas chi funt tzerriaus a fairi.
“Chi ndi tiraus su cumentzu de sa partida aunia fustis timorosus, sa scuadra, in segus, at giogau e at tentu calencuna ocasioni po segnai a innantis de su Pisa. In su segundu tempus eus giogau ancora meglius, de fatu eus pigau unu gol po una faddina chi sussedit pagas atras bortas e a livellu de conca nos at postu problemas. M’est pragia sa reatzioni e depu nai ca chini est imbucau in campu at donau totu e at mudau sa partida”. Custus is fueddus de s’allenadori casteddaiu Liverani a pustis de sa partida contras de su Pisa de sabudu passau.
“Non soi cuntentu de sa classifica – sighit Liverani – ma su giogu chi seus fendu, a tretus, mi pragit, finas chi peruna scuadra chi eus atobiau nos at postu a suta po totu sa partida. Forsis in Genova, cun su Genoa, nosi seus difendius prus de cussu chi depiaus fairi e non eus giogau sa partida chi iaus preparau a intru de sa cida. Custu bolit nai ca seus nosu chi depeus migliorai, trabbagliendu de prus e cichendu de donai una svolta a su campionau. Is tres puntus nosi mancant meda, ma soi seguru ca comenti cumentzaus a binciri non si frimmaus prus poita teneus totu e sa sociedadi nos at postu a dispositzioni giogadoris bonus chi depint feti bogai sa barrra. Ma giai una partida che cussa de sabudu atras scuadras forsis dd’ant airi perdia. Immoi teneus duas cidas po trabbagliai in pagi e po cicai de arrecuperai giogadoris chi fut foras po infortunius”.
Màuru Mura
Lunis, su 14 de Sant’Andria de su 2022
Foto: https://www.dazn.com/it-IT/news/serie-b/diretta-cagliari-pisa-dove-vederla-in-tv-e-live-streaming/m4w1zi1aoj921mdpnv6d5egnn
