Cuatru partidas cun scuadras chi gherraiant po si sarvai ant fau torrai in atras pensadas su Sassuolo. Chi immoi a is palas suas s’agatat feti sa Salernitana. E non feti custu. Finas Frosinone e Lecce, chi finas atempus pagu pariant chi depessinti fairi unu campionau trancuillu funt torradas aunia depiant essiri de su cumentzu de su campionau. Sa “guerra” po non ci calai in serie B, a pustis sa giorronada de bintiseti est prus alluta che mai. In pissu de Sassuolo, chi s’agatat a binti puntus, e Salernitana, chi est a 16, ddue funt ses scuadras in tres puntus (Empoli e Lecce a 25 puntus, Frosinone e Udinese a 24 e Casteddu cun su Verona a 23) e is urtimas undigi giorronadas chi mancant ant esside gherrai una po una.
Is vitorias de su Casteddu cun su Verona, is paregius de Lecce, Frosinone e Udinese e sa partida de s’Empoli perdia cun su Casteddu de Ranieri, ant acurtziau meda sa classifica in sa zona caglienti.
Su Genoa si podit nai sarvu ca est a 33 puntus, ma dapoi dogna scuadra depit timiri. Cussa posta peus parit su Sassuolo, chi at perdiu is urtimas cuatru partidas e, tocat a ddu nai, finas a s’acabbu depit giogai chena Berardi, chi est su campioni prus mannu chi tenit in sa scuadra. Sa Salernitana, cun feti 14 puntus, parit giai spaciada cun dd’unu pei e mesu in Serie B.
Bastat una partida binta po pigai sulidu e una perdia po di afundai. E sa cida chi benit c’ant essi atras tres partidas caglientis: su Casteddu si dda giogat cun sa Salernitana, ca chi perdit est spaciada de averas, su Sassuolo cun su Frosinone, chi in is urtimas degi giorronadas funt cussas postas peus e finas sa partida intru de Lecce e Verona non brullat. S’Udinese e s’Empoli non si podint ponni a erriri ca depint andai in Roma, cun sa Latzio e in Milano cun su Milan.
Po su Casteddu, dominigu passau, s’est obertu unu mesi de importu mannu, in su cali podint fairi puntus chi ant a serbiri meda: dominigu, comenti eus nau, cun sa Salernitana, a pustis cun su Monza, chi non tenit meda de eita nai de immoi in sus e duncas atra partida in domu cun su Verona. Ranieri est fendu un’atra cosa de mannu.
Màuru Mura
Lunis, su cuatru de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.pianetamilan.it/stagione/serie-a-news-e-risultati/classifica-serie-a-2023-2024-tutti-i-risultati-della-giornata/
