Atra dì de fogus in Sardigna. Eriseru si nd’at contau bintunu in totu sa regioni. Cincu cussus prus mannus chi ant bofiu s’agiudu de is aparechius de sa Forestali.
Sa prima emergentzia est tocada a Monti, in logu “Riu de Crasta” aunia funt abbrugiaustres etarus de padenti. Funt intervennius dus elicoterus lompius de is basis de Alà dei Sardi e Limbara e su Canadair erribau de s’aeroportu de Terranoa. Calencuna scuadra de terra puru at cicau de donai una manu de agiudu po cicai de ndi smorri is pampas: una de sa forestali de Berchidda, tres scuadras de Forestas, duas de barracelli e una scuadra de is Vigilis de su fogu de Terranoa.
Dus etarus de padenti in cinisu finas in su sartu de Bono, in localidali “Su Fossu”, aunia funt intervennius dus elicoterus chi erribaiant de Anela e Farcana. A terra is scuadras de sa Forestali de Benetutti, de su Gauf, una scuadra de Forestas, una de is Vigilis de su fogu de Tatari, una de sotziu de volontarius e duas de barracelli.
Dus etarus de olias in cinisu in Pabillonis, in logu “Corralis”, aunia est intervenniu un elicoteru partiu de sa basi de Marganai. Innoi at ghiai is operatzionis de smorrimentu sa statzioni forestali de Guspini.
Emergentzia finas in Perfugas, in logu “Calaresu”, aunia su fogu at abbrugiau cuatr’etarus de passiali. Dus elicoterus intervennius de is basis de Limbara e Anela, e finas su Canadair lompiu sempiri de Terranoa.
Meda temus c’at bofiu a ndi smorri is pampas de su fogu de Santu Baingiu, in logu “Nuraci”. Gratzias a s’agiudu de dus elicoterus de sa Forestali e is scuadras a terra de sa matessi Forestali, una scuadra de Vigili de su fogu e tres sotzius de volontarius.
Mali, meda mali, finas poita sa cida benidora, e custas dis puru, funt annunciadas comenti cussas prus caglientis de totu s’annu. E candu is temperaduras giumpant is corant gradus est prus facili meda chi su fogu picighit.
Pobora Sardigna!
19 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.ilmeteo.it/notizie/incendi-sardegna-situazione-tragica-1500-sfollati-la-protezione-civile-chiede-aiuto-alleuropa-foto-e-video-114720
