Notesta passada, in Italia, a is Mondialis de atletica chi si funt fendu in Eugene, in Oregon, Filipu Tortu est intrau intru cussus chi s’ant a giogai sa semifinali de is 200 metrus, currendu in 20”18. Lastima manna, invecias po su sardu Fausto Desalu chi cun 20”63 no est arrennesciu a si cualificai.
Mancaiat dus de is prus bravus, De Grasse e su giaponesu Koibe, e Tortu no at tentu perunu problema in s’acabbu de sa gara a erribai po primu, lassendu in palas Gorra cun 20”44.
Desalu, a s’imbessi, currit beni po is primus centubinti metrus ma acabbat a bellu-a bellu a si ndi smorri, giumpau a innantis, po su tertzu postu de s’ugandesu Orogot, e de fatu acabbendu finas de tenni cuntatus cun is primus (su dominiganu Ogando ce dda fait cun 20”01). Cun 20”63 benit bogau a foras. Comenti totu si chesciaiant in is 200 metrus dd’ant fat de meris is americanus.
Nohah Lyles lompit po primu cun 19”98, sighiu de Erryon Knighton cun 20”01. Fred Kerley, campioni de su mundu de is centu metrus, lompit a 20”17. Tortu est cuasi a su costau de Kerley. Si torrat a curriri cras, galu una borta in su noti italianu: cuasi is cuatru de mengianu.
Sa cuartesa Dalia Kaddari at cursu is 200 metrus po is feminas serrendu comenti de tertza cun su tempus de 22”75. S’atleta sarda at fatu cussu chi si iat postu in conca, e si cualificat a sa semifinali de cras, a is 3:05 italianas. A su primu postu sa giamaicana Shericka Jackson, cun 22”33.
Giuannimarcu Tamberi, campioni olimpicu, s’aciapat su cuartu postu, firmendusì a dus metrus e 35. S’atleta marchigianu no at tentu peruna dificultadi in is primas provas, finas chi non fut postu beni meda fisicamenti. Sa medaglia est andada a su catariota Mutaz Essa Barshim, sa medaglia de prata a sa Corea de basciu cun Woo chi at sartau 2.39 e su brunzu a s’ucrainu Protsenko cun 2.33.
Amigus de sempiri, bellu nosi est partu s’imbrassu intru Tamberi e Barshim.
19 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.centotrentuno.com/news/atletica-filippo-tortu-lultima-frazione-di-tokyo-mi-ha-trasformato/
