Mosca bolit, chena atra cosa, chi is Ucrainus si nd’andint de Mariupol, una de citadis prus derutas de sa guerra chi de bintises dis nos’acumpangiat lassendunosì chena sulidu, ma de Kiev arrespundint ca non ci funt mancu pensendu.

Sa Russsia ddu at nau craru e tundu cumbidendu 2totu is sordaus ucrainus a lassai a Mariupol, po custu mengianu intru de is dexi e mesudì de lassai is armas e a nci bessiri in su caminu chi s’est decidiu cun is ucrainus etotu”, at nau su capu de sa difesa natzionali de sa Russsia Mikhail Mizintsev.

A custus fueddus at arrespustu inderetura sa numuru dus de su guvernu ucrainu, Iryna Vereshchk: “No est unu scioberu chi teneus in conca”, aciungendu dapoi ca: “Kiev pedit unu caminu seguru po sa genti comuna. Caminu chi is russsus iat airi fatu feti chi paris a is civilis ci bessiant totu is sordaus.

Parit, a custu puntu, chi s’aprontit sa bataglia de s’acabu po sa citadi chi s’incrarat in su mar d’Azov.

In su fratempus atra noti de bombas e pigadas de mira funt stetias massimamenti Kiev e sa regioni de su nord orienti de Sumy. In sa capitali boddias domus e unu centru comerciali e de cussu chi narant is ucrainus si contant sonumancu ses mortus.

In su fratempus, oi, sighit su trabagliu de sa diplomatzia. E sighit finas a si moviri s’orrestu de su mundu cun sa Svitzera ci est pronta a fairi atobiai is partis in terra sua. Cenarba su presidenti de is Stadus Unidus, invecias, at a lompiri in Polonia po atobiai su presidenti polacu Andrzej Duda.

Sighit sa guerra e su mundu timit, comenti forsis mai est sussediu de s’acabu de sa segunda guerra mondiali. Si timit po cussu chi possat fairi sa Cina. Ma aberu boleus erribai a s’acabu de su mundu? Non si tenit su pensamentu ca a ponni in mesu totu is Stadus at a ponniri s’acabu de s’omini? Parit ca is interessus de dognunu siant prus de importu mannu de totu s’orrestu, forsis de averas, po curpa de pagus, est giustu chi non sighiaus a biviri.

Custu est su pensamentu malu, ma a pustis sa vida de dognunu de nosu sighit a andai a innantis cun fidi e spera manna: su beni depit binciri…

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://www.tgcom24.mediaset.it/mondo/bombe-su-mariupol-l-ultimatum-della-russia-militari-lascino-la-citta-in-cambio-un-cessate-il-fuoco-per-i-corridoi-umani_47666945-202202k.shtml