Un’atra partida perdia po su Casteddu, chi torrat in campu a pustis undixi dis e non ce dda fait a pigai puntus cun sa Fiorentina. Dapoi de su 1-2, Davidi Nicola chistionat cun is giornalistas: “Prus de sa lastima deu ia umperai un’atru fueddu”, is primus fueddus de s’allenadori. “Sa partida dda iaus aprontada po fairi atru, nos ant fatu piagai su nervosu ca sa partida dd’ant frimada meda e custu non si ddu podeus permitiri. Contra teniaus una scuadra chi tenit calidadi meda, ma abbisongiat pesai ancora de prus s’atentzioni, massimamenti in calencuna parti de su giogu”. Nicola sarvat, a dogna manera, sa scuadra: “Non ce dda facu a ddi nai nudda, sa scuadra at fatu cussu chi depiat fairi”. Immoi lompit sa partida contras de su Verona, lunis a merì: “Tocat a scaresciri custa partida e pensai a cussa benient”, narat Nicola. Ca non at a tenni Piccoli, poita su cartellinu grogu chi at pigau ddu fait scualificai: “Podiat sussediri. Ndi teneus meda de giogadoris suta difida, finas chi cicas de non faddiri ce dda podis fairi feti po unu pagu”. Est fnas a nai ca est bessiu de su campu Mina po mori de unu problema a sa coscia: “At tentu calencuna cosa, non sciu ancora comenti est postu, ma depu finas nai ca Palomino est imbucau beni”.
Sa vitoria de spantu de su Parma contras de sa Juventus arriolat unu pagau: “Nosi mancant puntus e ddus depeus fairi coidendu”, su cumandu de Nicola. Arriolat finas ca su Casteddu est partiu beni meda, ma, in segus, est calau ateretanti. “Teneus una manera nosta de giogai, po mimi eus fatu beni candu poderaiaus sa bocia. Chi eus patiu ddu eus fatu candu bessiant, ma mancu meda”. Nicola, in pissu de su gol de Beltran, narat ca nemus at faddiu, ma donat miniscimentu mannu a sa Fiorentina: “Bravus issus. Nosu depeus cicai calidadi manna po fairi gol, calencuna bia nos arrennescit, atras prus pagu”.
Màuru Mura
Giobia, su binticuatru de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=L6Gdp8_o2aw
