Su mesi de gennargiu, candu si podint comporai e bendiri giogadoris acabbat, po su Casteddu cun su lompimentu in Sardigna de Yerri Mina po sa difesa e de Gianluca Gaetano po su mesu campu. Su de unu erribat de sa Fiorentina e su de dus de su Napoli.
In bessida, duncas bendius a atras scudras, Gaston Pereiro a sa Ternana, Goldaniga a su Como e su cuntratu sciusciau a Capradossi. Su diretori Bonato at, in segus, donau po s’orrestu de s’annu Desogus a su Gubbio e Contini, chi est torrau a innantis de s’Olbia, a sa Virtus Francavilla. Lompint in Casteddu finas dus giogadoris po sa scuadra de is giovunus: Simonetta cun Marini.
In difesa, duncas, Ranieri at a acingiri un’atru giogadori comenti su colombianu Mina, chi tenit bintinoi annus. Su cartellinu de Mina immoi est totu de su Casteddu. Eris Mina at atobiau inderetura s’orrestu de is piciocus de Ranieri e at finas cumentzau a trabagliai paris. Oi at a chistionai, invecias, cun is giornalistas.
A mesu campu, Bonato e Giulini, ant provau a arregalai a Ranieri su giogadori de sa Republica Ceca Antonin Barak. Ma sa Fiorentina non est arrennescia a agatai calencunu chi pighessit su postu de su centrucampista e at frimau sa bessida. Tandu su Caseddu at cicau a Gaetano de su Napoli, giogadori de mesu campu su matessi, nasciu in su 2000. Gaetano lompit in Sardigna feti finas a su mesi de làmpadas e giai de oi at a trabagliai cun Ranieri. Aici comenti at a abarrai finas a làmpadas Shomudorov, cicau de sa Salernitana.
Immoi sa scuadra est custa e tocat a gherrai cun custus giogadoris. Giai de dominigu at a tocai de fairi puntus cun sa Roma. In su paperi parit una de cussas partidas chena perunu contu, ma sa bocia est tunda e arregalat spantus in donnia. Ranieri at essi giai aprontendu calencuna cosa po ponni problemas a sa scuadra de De Rossi. Fidi, tocat a tenni fidi in Ranieri.
Màuru Mura
Cenarba, su tres de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.numero-diez.com/il-cagliari-presenta-rino-gaetano-e-yerry-mina-il-simpatico-omaggio/
