Est diventendu unu misteriu su iagi, mai fatu po immoi de Mateu Salvini in Mosca po cicai de ponni fini a sa guerra in Ucraina. De dogna parti su “leader” de sa Lega ndi boddit scutas de fueddus e sulidus. De arregodai ca Salvini non tenit perunu cumandu de su guvernu po si moviri e est fendu totu de conca sua.

A nomini de su partidu, narat a is giornalistas a costau de su Senau: “Is relatas internatzionalis funt in manus a mei e a su responsabili po is strangicidiri chini atobiaius Larentu Fontana. Unu capu de partidu tenit s’onori e su doveri, in nomini de sa pagi, de decidiri chini atobiai e candu ddu fairi”.

In pissu de is ministrus chi non sciant nudda: “A mei pragit fairi is cosas e de fatu ddu nau a cosas fatas, s’obietivu fut de andai in Mosca torrendu a domu cun un’arresurtau de donai a su guvernu”.

Unu iagi chi, ormai, a cantu parit non s’at a fairi: “Est ancora in peis? Ma chi m’ant scutu de drestra e manca galu prima de partiri. Deus oi trabagliendu de Roma e de Milano: chi su Partidu Democratigu non bolit eus a cicai de nosi ponni a chistionai o tenni su matessi arresurtau po telefunu aspetendu Letta e Di Maio”.

Sa chistionada, narat a pustis su capu de sa Lega, non fut Putin: “Non ddu intendu de annus, unu de cussus de atobiai fut su ministru de is strangius”. Ma Lavrov at nau ca giai a s’atobiu? “Naraus ca chi bogliu ia podiri andai cras a Mosca o a Istanbul…”.

S’ambasciada russa in Italia at postu su dinari po Salvini po su iagi chiiat airi depiu fairi su 29 in Mosca e chi de fatu est sartau po is morrungius de totu is partis politigas.

Ddu fait sciri s’ambasciada etotu, nendu de airi”assistiu Mateu Salvini e cusssus chi depiant moviri cun issu po comporai is billetus”. Una cosa normali, narant de s’ambasciada, po is regulas chi nd’ant tirau is volus Roma-Mosca. A pustis sa faddina, narant sempiri de s’ambasciada, su dinari ddu ant torrau a sa Lega etotu. “Non ddu est nudda de sbagliau”.

 

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.italiachiamaitalia.it/salvini-pronti-i-nomi-dei-ministri-della-lega-video-di-battista-appoggio-matteo/