A sa serie A Vitoriu Pusceddu, nasciu, e pasciu, in Buggerru su 12 de friargiu de su 1964, si presentat comenti pagus giogadoris podint fairi: in San Siro, candu bestiat sa maglia famada de su Torinu, de trintacincumetrus tirat cun su pei mancosu e fait gol a Zenga, chi tandu fut su portieri de sa Natzionali italiana. Pariat ca fut nasciu unu campioni, invecias cuss’annu Pusceddu giogaiat feti atrus orrugus de partidas, cincu in totu, fendu, a dogna manera un’atru gol contras de s’Avellino.

A pustis airi giogau cun is giovunus, cumentzat sa carrriera sua cun su Casteddu in serie B, ca tandu sa scuadra de sa capitali sarda fut unu prantu. Giogat e segnat calencunu gol, sempiri de tesu ca teniat unu tiru de importu. Ddu comporat su Torinu de Gigi Radice, ma in sa scuadra piemontesa non tenit fortuna meda e tandu andat a giogai a innantis in s’Ascoli e in segus in s’Udinese e su Genoa.

In su campionau 1989-90 Vitoriu andat a giogai cun su Verona de Osvaldo Bagnoli, allenadori chi ddu umperat comenti de difensori e tertzinu. Giogat beni su piciocu de su Sulcis, ma su Verona ci calat in serie B su matessi. S’annu infatu abarrat in Verona e totu e donat una manu de agiudu po torrai a portai in Serie A is grogus-asulus.

A pustis una stagioni cun sa maglia de su Napoli, torrat in su 1992 a su Casteddu. In Sardigna abarrat po cuatr’annus, is meglius de sa scuadra sarda a pustis su scudetu de su 1970. Su Casteddu erribat in artu e ce dda fait a giogai in Coppa Uefa aunia ci stupat in is cuartus de finali sa Juventus de Baggio. Pusceddu ce dda fait a fairi unu gol contras sa scuadra belga de su Malines, in d’una partida chi est abarrada in sa conca de totu is tifosus. Lassau su Casteddu, Pusceddu, andat a sa Fiorentina e in segus a s’Empoli. De sa scuadra Toscana passat a su Torinu, chi tandu s’agataiat in Serie B, e s’arretirat a trintacuatr’annus po cumentzai sa carriera de allenadori.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.ebay.it/itm/183877931078