Non feti sa bogi de s’Assoarmatori po intervenniri in su setori po cicai de non fairi pesai su pretziu, chi parit impossibili a non dde ddu pesai, poi s biglietus poi s navis po sa Sardigna, sa Corsica, s’Isula d’Elba, sa Sicilia e is atras isolas prus piticas. Finas Ugo Cappellacci, deputau de su Parlamentu italianu e capu, in Sardigna, de Fortza Italia artizat sa bogi: “Naraus bastat cun sa continuidadi territoriali aici comenti est posta”.

Is fueddus tenint s’obietivu de erribai a su guvernu italianu chi si facat, dapoi, intendiri in Bruxelles: “S’Europa – narat Cappellacci – traigit is regulas e is principius sus cun pensamentus strintus meda chi non tenint in perunu contu ca sa Sardigna est un’Isula. E un’Isula tenit necessidadis diversas po si moviri de una parti a s’atra. E de custa necessidadi ndi tenit abbisongiu totu s’atru mundu: cussu de su trabagliu, sa libbertadi de is siendas chena chi su mercau siat frimu de su pretziu de portai is mercis de una parti a s’atra e de su mundu de sa saludi finas. Totu custus diritus imoi funt postus paris de su Sistema de erribai de una parti a s’atra chi non podit esistiri”.

“In su 2013 – sighit a nai su deputau – candu in cussu tempus fui presidenti de sa Regioni – iaus fatu una continuidadi po is aereus chi doniat su pretziu prus basciu a chini teniat sa residentzia e po noi mesis a s’annu finas po is disterraus nostus epo chini chi siat boliat lompiri in s’Isula nosta poita s finalidadi depit essi cussa de uniri is terras e po fairi girai genti e mercis, in intrada e in bessida”.

“Non ce dda boleus acabbai che is indianus, poita nd’ant tirau una mesura chi teniat comenti de fini su svilupu economicu e sociali de sa Regioni arrecramau de is regulas comunitarias 1008 de su 2008? De su 2013 a oi seus sempiri un’Isula, bastat a donai una mirada a una cartina e si cumprendit!”.

 

 

30 de martzu de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.regione.sardegna.it/j/v/2576?s=1&v=9&c=12043&na=1&n=1