Agatendu de acordiu Ali Khamenei, ca est cussu chi cumpudat totu sa vida politiga e economica de su Stadu, in Iran mudat su presidenti: Ebrahim Raisi. Su presidenti nou at fatu sciri inderetura ca “s’at a trabagliai po ndi tirai is santzionis americanas, ma non eus donai bogi a is strangius”.
Martis sa televisioni iraniana at amostau totu sa tzirimonia e giobia Raisi at a intrai in su Parlamentu po pediri sa fiducia e po fairi connosciri calencunu nomini de is ministrus.
Raisi est unu religiosu chi non bit atru, nasciu in Mashhad, sa citadi santa sciita, fut capu de sa magistradura in is urtimus tres annus a imoi, postu de Khamenei. Po is sotzius chi difendint is diritus de is ominis, Raisi in su 1988 faiat parti de una truma de cuatru chi ant mandau a morri migliaias de presoneris politigus candu si fut cumbatendu sa gherra intru de s’Iran e s’Iraq.
Certu ca is eletzionis iranianas no ant bidu sa genti cravendusì po andai a votai: de is cincuantanoi milionis chi ndi teniant diritu feti in dixiaseti ant postu sa grugi in sa scheda. Cussu chi agatat Raisi est unu Stadu postu mali, po dinari massimamenti, ma finas po is relatas cun is atrus stadus ocidentalis. Una cosa est segura: s’Iran at a castiai prus a Orienti, ca funt is cosas chi at sempiri nau Khamenei. Sa curpa de s’Iran poburu est, po Raisi, curpa manna de chini cumandaiat a innantis, Khamenei e totu at cumbidau is aministradoris nous a non tenni mai fidi in is ocidentalis ca is contus de s’Iran fueddant craru.
“De oi – at nau Raisi eriseru – trabagliaus cun d’unu programa de apretu po fairi calencuna cosa de mannu po is primus dexi problemas de su Stadu, massimamenti sa mancantzia de dinari, coronavirus, mancantzia de abba e de eletricidadi. Eus a cicai de nosi acapiai a sa Cina e a sa Russia, lassendu a un’ala s’Ocidenti”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Ebrahim_Raisi
