S’apretu Coronavirus crescit in Casteddu puru, aunia eriseru amengianu si funt atobiaus su sindigu cun su comissariu Ares-Ats Massimu Temussi, po chistionai de su contu de sa pesta e mascamente de is letus a dispositzioni in is spidalis.

Sa provincia de Casteddu, in s’urtima cida, at tentu prus de centu impestaus in pissu de centumila abitantis, est a nai trexentus e ses. Sa Sardigna totu, po cussu chi narat su matematicu Giuanni Sebastiani, de s’Istituto per le Applicazioni del Calcolo “Mauro Picone de su Cnr (Consigliu Natzionali po sa cica), est erribada in artu meda, po is impestaus e imoi, comenti totu s’Italia, at a cumentzai sa calada.

“Naraus ca no a regulas noas, ma depeus donai prus croba”, est cussu chi narat su sindigu Pàulu Truzzu. “Feti in sa citadi de Casteddu, po imoi, funt 708 is impestaus e catodixi cussus chi s’agatant in is aposentus de is spidalis – sighit a nai Truzzu – Torrendu gratzias a is vacinus, est a nai ca sa situatzioni est mudada meda pensendu a cussu chi fut in is mesis passaus. Is numurus chi teneus nos arregodant, a dogna manera, ca galu no est ancora acabau s’apretu e depeus sighiri sempiri cun is regulas chi beni connosceus”.

“In s’urtima cida, castiendu is numurus chi nosi donat s’Ats, sa pesta parit chi est sempiri sa matessi cosa, a pustis airi tentu numurus spantosus in is cidas de mesu de su mesi de triulas. Cussu chi arriolat est ca is impestaus funt, in sa citadi metropolitana de Casteddu, intru de is giovunus: su 30% de is impestaus nous s’agatant in is piciocus chi andant de is cuindixi a is bintinoi annus e cuasi su 70% a suta de is corantacuatr’annus. Po custu eriseru a mengianu, in s’atobiu cun su Comissariu de s’Ats Massimu Temussi e is atrus sindigus de sa citadi metropolitana, eus decidiu de fairi de totu po vacinai, a lestru, sa genti chi tenit prus de sessant’annus, chi non ddu ant ancora fatu, e is prus giovunus. Po custus serbit ancora de prus, ca sa scola cumentzat tra pagu e depeus cicai de ddus fairi torrai in presentzia e non cun sa Dad”.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://it.wikipedia.org/wiki/Paolo_Truzzu