Su Cungressu americanu at donau is arresurtaus de is eletzionis de su mesi de Sant’Andria passau. Una aministratzioni noa at intrai su binti de gennargiu. Cussu chi boglui deu est de assegurai unu cambiu de is poderis in pagi e trancuillidadi.

Donald Trump po sa prima borta a pustis de cidas e cidas chi poniat fogu po sa vitoria de Biden, arreconnoscit de airi perdiu e ddu fait non fenduru mai su nomini de Joe Biden.

Chistionat e narat sa sua in d’unu video postu in Twitter eriseru, a pusti totu cussu chi est sussediu sa dì innanti cun sa carriga a Capitol Hill de is tifosus sus. Chistionat, nendu a is americanus ca sa prepotentzia no andat beni e ca issu e totu at a trabagliai po fairi sa pagi.

In prus de is cuatru mortus de s’atra dì, in is oras passadas est mortu finas unu politziotu chi iant feriu is fans de Donald Trump. S’agenti si lamaiat Brian Sicknick.

“Est tempus de sfridai is corus e de torrai a sa trancuillidadi. Tocat a torrai a sa normalidadi de s’America”, at nau su presidenti chi est acanta de nci bessiri, chistionendu de sa Casa Bianca e umperendu fueddus grais contras de cussus chi ant carrigau: “Bosatrus non rapresentais s’America, cussus chi ant faddiu ant a pagai. S’America depit essiri su logu de sa lei e de s’ordini”.

Custa borta no at chistionau de is eletzionis e no at nau ca dd’ant cogliunau: “Sigu a creiri ca depeus cambiai is leis eletoralis”.

Sa bortada est erribada a pustis una dì aunia is bogis de nci bogai Trump a innantis de su binti de custu mesi, candu Biden at a diventai presidenti de is Stadus Unidus, si funt fatas sempiri prus artas. Is capus de is democraticus, Nancy Pelosi cun Chuck Schumer, ant pediu de pigai po bonu cussu chi narat su emendamentu de binicincu e, chi non fait cussu, a umperai s’impeachment. Biden no est de acordiu cun sa Pelosi e Schumer, ca iat a bolli prus a s’apagiai po non segai in dus s’America e is americanus.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

https://www.ilfriuli.it/articolo/politica/usa-i-fan-di-trump-fanno-irruzione-nel-congresso/3/234256